Tadap - RX 100 : మెగాస్టార్‌ మెచ్చిన ‘ఆర్‌ఎక్స్‌ 100’ రీమేక్‌ ట్రైలర్‌ ఇదే!

ముంబయి: చిక్కటి ప్రేమకథా చిత్రంగా తెరకెక్కి.. బాక్సాఫీస్‌ వద్ద వసూళ్ల వర్షం కురిపించిన చిత్రం ‘ఆర్‌ఎక్స్‌ 100’ (RX 100). టాలీవుడ్‌లో సూపర్‌హిట్‌ సొంతం చేసుకున్న ఈ చిత్రాన్ని ‘తడప్‌’ (Tadap) పేరుతో ఇప్పుడు బాలీవుడ్‌లో రీమేక్‌ చేస్తున్నారు. ప్రముఖ బాలీవుడ్‌ నటుడు సునీల్‌ శెట్టి కుమారుడు అహాన్‌ శెట్టి (Ahan Shetty) ఈ చిత్రంతో హీరోగా ఎంట్రీ ఇస్తున్నారు. అహాన్‌కు జంటగా తారా సుతారియా (Tara Sutaria) కథానాయికగా నటిస్తున్నారు. మిలాన్‌ లుతారియా (Milan Luthria) దర్శకత్వం వహిస్తున్న ఈ సినిమా డిసెంబర్‌ 3న (Tadap Release Date) ప్రేక్షకుల ముందుకు రానుంది. ఈ నేపథ్యంలో బుధవారం ఉదయం ‘తడప్‌’ ట్రైలర్‌ను చిత్రబృందం విడుదల చేసింది. అహాన్‌, సుతారియా నటన... వారి డైలాగ్‌లు ఆకట్టుకుంటున్నాయి. ట్రైలర్‌లోని ప్రేమ, యాక్షన్‌ సన్నివేశాలు మాతృకను గుర్తుచేసేలా ఉన్నాయి. మరోవైపు ‘తడప్‌’ చిత్రానికి ప్రముఖ కథానాయకుడు చిరంజీవి (Chiranjeevi) అభినందనలు తెలిపారు. ట్రైలర్‌ చాలా బాగుందని.. సినిమా విజయం సాధించాలని కోరుకున్నారు.