Thalaivii: ‘తలైవి’ విడుదల ఖరారు.. రౌడీ బాయ్‌ విచ్చేశాడు

ఇంటర్నెట్‌ డెస్క్‌: కంగనా రనౌత్‌ ప్రధాన పాత్రలో నటించిన చిత్రం ‘తలైవి’. తమిళనాడు మాజీ ముఖ్యమంత్రి జయలలిత జీవిత కథతో రూపొందిన పాన్‌ ఇండియా చిత్రమిది. ఏ.ఎల్‌. విజయ్‌ దర్శకుడు. విష్ణు ఇందూరి, శైలేష్‌ ఆర్‌ సింగ్‌, బ్రిందా ప్రసాద్‌ నిర్మాతలు. ఈ చిత్రాన్ని సెప్టెంబరు 10న విడుదల చేస్తున్నట్టు చిత్ర బృందం తాజాగా ప్రకటించింది. ఈ మేరకు కొత్త పోస్టర్‌ని విడుదల చేసింది. ఏప్రిల్‌లోనే విడుదల కావాల్సిన ఈ సినిమా కరోనా కారణంగా వాయిదా పడింది. ఈ చిత్రంలో అరవింద్‌ స్వామి, ప్రకాష్‌రాజ్‌, పూర్ణ, మధుబాల తదితరులు కీలక పాత్రలు పోషించారు. ఈ సినిమాకి సంగీతం: జీవీ ప్రకాష్‌, ఛాయాగ్రహణం: విశాల్‌ విఠల్‌.

ఆశిష్‌ ఆగమనం..

 దిల్‌రాజు మేనల్లుడు ఆశిష్‌ కథానాయకుడిగా పరిచయమవుతున్న చిత్రం ‘రౌడీ బాయ్స్‌’. అనుపమ పరమేశ్వరన్‌ కథానాయిక. ‘హుషారు’ ఫేం హర్ష కొనుగంటి దర్శకత్వం వహిస్తున్నారు. ఆశిష్‌ ఫస్ట్‌లుక్‌ని సామాజిక మాధ్యమాల వేదికగా చిత్రబృందం విడుదల చేసింది. ఈ పోస్టర్‌లో ఆశిష్‌ కెమెరాని పట్టుకుని కనిపించారు. చేతులపై టాటూలతో దర్శనమిచ్చి ఆకట్టుకుంటున్నారు. ఇంజినీరింగ్‌, మెడికల్‌ కాలేజీ విద్యార్థుల మధ్య సాగే కథ ఇది. ప్రేమ, యాక్షన్‌ డ్రామా నేపథ్యంలో రూపొందుతోంది. శ్రీ వెంకటేశ్వర క్రియేషన్స్‌ పతాకంపై దిల్‌రాజు నిర్మిస్తున్న ఈ చిత్రానికి దేవి శ్రీ ప్రసాద్‌ సంగీతం అందిస్తున్నారు. ఈ చిత్రం అన్ని కార్యక్రమాల్ని శరవేగంగా పూర్తి చేసుకుని అక్టోబరులో ప్రేక్షకుల ముందుకు రానుంది.