Saamanyudu:రాక్షసుడితో ‘సామాన్యుడు’ పోరు

విశాల్‌ హీరోగా నటిస్తూ.. స్వయంగా నిర్మించిన చిత్రం ‘సామాన్యుడు’. తు.ప.శరవణన్‌ తెరకెక్కించారు. డింపుల్‌ హయాతి కథానాయిక. ఈ సినిమా వచ్చే ఏడాది జనవరి 26న ప్రేక్షకుల ముందుకు రానుంది. ఈ నేపథ్యంలోనే   శనివారం టీజర్‌ విడుదల చేశారు. ‘‘ఇక్కడ రెండు రకాల మనుషులే ఉన్నారు. ఒకరు జీవితాన్ని అది నడిపించే దారిలో జీవించాలనుకునే సామాన్యులు. ఇంకొకరు సామాన్యుల్ని డబ్బు, పేరు, పదవి, అధికారం కోసం అంతం చేయాలనుకునే రాక్షసులు. ఆ రాక్షసుల తల రాతని మార్చి రాయాల్సిన పరిస్థితి ఒక రోజు ఓ సామాన్యుడికి వస్తుంది’’ అనే డైలాగ్‌తో టీజర్‌ ఆసక్తికరంగా సాగింది. ప్రచార చిత్రంలో కనిపించిన సన్నివేశాల్ని బట్టి.. సినిమాలో యాక్షన్‌కు పెద్ద పీట వేసినట్లు అర్థమవుతోంది. టీజర్‌ ఆఖర్లో ‘‘అయితే నువ్వీ పోరాటాన్ని ఆపవు కదా’’ అంటూ ఓ వ్యక్తి ప్రశ్నించగా.. ‘‘అది నిర్ణయించాల్సింది నా శత్రువు’’ అంటూ విశాల్‌ బదులివ్వడం ఆసక్తిరేకెత్తించింది. ఈ చిత్రానికి సంగీతం: యువన్‌ శంకర్‌ రాజా, ఛాయాగ్రహణం: కెవిన్‌ రాజా.