Vijay: 67వ చిత్రం హంగామా

తమిళ అగ్ర కథానాయకుడు విజయ్‌ (Vijay), ‘విక్రమ్‌’ దర్శకుడు లోకేష్‌ కనగరాజ్‌ (Lokesh Kanagaraj) కలయికలో ఓ చిత్రం తెరకెక్కుతోంది. ‘మాస్టర్‌’ తర్వాత ఈ ఇద్దరి కాంబినేషన్‌లో వస్తున్న సినిమా కావడంతో అభిమానుల్లో భారీ అంచనాలు నెలకొన్నాయి. దీనికితోడు త్రిష, సూర్య, సంజయ్‌దత్‌, అర్జున్‌లాంటి భారీ తారాగణంతో రూపొందనుందనే సమాచారంతో అంతటా ఆసక్తి నెలకొంది. ఈ చిత్ర షూటింగ్‌ చెన్నైలోని ఫిల్మ్‌సిటీలో శరవేగంగా సాగుతున్నట్టు నటుడు మనోబాల మంగళవారం సామాజిక మాధ్యమాల్లో ప్రకటించారు. గ్యాంగ్‌స్టర్‌ డ్రామా కథాంశంతో పాన్‌ ఇండియా చిత్రంగా రూపొందుతున్న ఈ సినిమాలో భాగమయ్యామంటూ గౌతమ్‌మేనన్‌, మన్సూర్‌ అలీఖాన్‌ ఇదివరకే తెలిపారు.

అట్లీతో 68వ సినిమా?

విజయ్‌, అట్లీ కలయికలో ఓ కొత్త సినిమా ప్రారంభం కానున్నట్టు సమాచారం. దీనికనుగుణంగా అట్లీ (Atlee) మంగళవారం వికీపీడియా పేజీలో విజయ్‌ 68వ చిత్రానికి దర్శకత్వం వహించనున్నట్టు మార్పులు చేశారు. ఈ చిత్రం షూటింగ్‌ జూన్‌లో మొదలు కానున్నట్టు తెలుస్తోంది. విజయ్‌, అట్లీల కలయికలో గతంలో ‘థేరి’, ‘మెర్సల్‌’, ‘బిజిల్‌’ సినిమాలు వచ్చాయి.