Thalapathy 67: ‘మాస్టర్‌’లు మళ్లీ కలిశారు.. నిర్మాణ సంస్థ అధికారిక ప్రకటన

చెన్నై: ‘మాస్టర్‌’ చిత్రంతో నటుడు విజయ్‌ (Vijay)- దర్శకుడు లోకేశ్‌ కనగరాజ్‌ (Lokesh Kanagaraj) కాంబో కోలీవుడ్‌, టాలీవుడ్‌లో మంచి క్రేజ్‌ సంపాదించుకుంది. వీరిద్దరి కాంబినేషన్‌లో మరో సినిమా తెరకెక్కుతుందనే విషయం తెలిసిందే. దానిపై నిర్మాణ సంస్థ 7 స్క్రీన్‌ స్టూడియో సోమవారం అధికారిక ప్రకటన ఇచ్చింది. ‘‘మాస్టర్‌, వారిసు చిత్రాల తర్వాత విజయ్‌ సర్‌తో మరోసారి కలిసి పనిచేస్తుండడం చాలా సంతోషంగా ఉంది. #Thalapathy67 (వర్కింగ్‌ టైటిల్‌)కు లోకేశ్‌ కనగరాజ్‌ దర్శకత్వం వహిస్తున్నారు. జనవరి 2న చిత్రీకరణ ప్రారంభమై, శరవేగంగా జరుగుతోంది. ‘కత్తి’, ‘మాస్టర్‌’, ‘బీస్ట్‌’ తర్వాత విజయ్‌- సంగీత దర్శకుడు అనిరుధ్‌ రవిచందర్‌లో కాంబినేషన్‌లో రూపొందుతోన్న చిత్రమిది. ఈ సినిమాకి ఛాయాగ్రహణం: మనోజ్‌ పరమహంస, యాక్షన్‌: అన్బరివ్‌, ఎడిటింగ్‌: ఫిలోమిన్‌రాజ్‌, కొరియోగ్రఫీ: దినేశ్‌, సంభాషణలు: లోకేశ్‌ కనగరాజ్‌, రత్నకుమార్‌, దీరజ్‌ వైదీ. ఇతర నటుల వివరాలు త్వరలోనే వెల్లడిస్తాం ’’ అని 7 స్క్రీన్‌ స్టూడియో టీమ్‌ ప్రకటనలో తెలిపింది.

కమల్‌హాసన్‌ హీరోగా గతేడాది తాను తెరకెక్కించిన ‘విక్రమ్‌’తో లోకేశ్‌ ‘సినిమాటిక్‌ యూనివర్స్‌’ సృష్టించిన సంగతి తెలిసిందే. మరి ఈ చిత్రాన్ని అందులో భాగం చేస్తారా, లేదా? వేచి చూడాల్సిందే. ఇందులో కథానాయికగా త్రిష ఎంపికయ్యారని, బాలీవుడ్‌ నటుడు సంజయ్‌దత్‌, అర్జున్‌ తదితరులు కీలక పాత్రలు పోషిస్తున్నారని ప్రచారం జరిగింది.