Tollywood: ‘సార్‌’ మెలొడీ.. ‘హిట్‌ 2’ రొమాంటిక్‌ వీడియో.. విశ్వంత్‌ కొత్త చిత్రం

హైదరాబాద్‌: తమిళ నటుడు ధనుష్‌ (Dhanush) హీరోగా టాలీవుడ్‌ దర్శకుడు వెంకీ అట్లూరి తెరకెక్కిస్తోన్న చిత్రం ‘సార్‌’ (Sir). ఈ చిత్రంలోని తొలి పాట గురువారం విడుదలైంది. ‘మాస్టారు మాస్టారు’ అంటూ సాగే ఈ మెలొడీని రామజోగయ్య శాస్త్రి రాశారు. జీవీ ప్రకాశ్‌కుమార్‌ స్వరాలు సమకూర్చగా శ్వేతా మోహన్‌ ఆలపించారు. ధనుష్‌, సంయుక్తా మేనన్‌ జోడీ అందరినీ ఆకట్టుకునేలా ఉంది. విద్యా వ్యవస్థ నేపథ్యంలో యాక్షన్‌- డ్రామాగా రూపొందుతోన్న ఈ సినిమా త్వరలోనే ప్రేక్షకుల ముందుకు రానుంది.

ఉరికే ఉరికే..

అడివి శేష్‌ (Adivi Sesh), మీనాక్షి చౌదరి జంటగా శైలేష్‌ కొలను దర్శకత్వంలో తెరకెక్కుతోన్న సినిమా ‘హిట్‌ 2’ (Hit 2). డిసెంబరు 2న ఈ చిత్రం ప్రేక్షకుల ముందుకు రానుంది. ఈ సందర్భంగా చిత్ర బృందం ‘ఉరికే ఉరికే’ వీడియో సాంగ్‌ను విడుదల చేసింది. ఈ రొమాంటిక్‌ గీతాన్ని కృష్ణకాంత్‌ రచించారు. ఎం. ఎం. శ్రీలేఖ స్వరాలు సమకూర్చారు. సిధ్‌ శ్రీరామ్‌, రమ్య బెహర ఆలపించారు.

క్రైమ్‌ థ్రిల్లర్‌గా..

విశ్వంత్‌ హీరోగా సహస్ర ఎంటర్‌టైన్‌మెంట్స్‌ పతాకంపై ఓ సినిమా పూజా కార్యక్రమాలతో లాంఛనంగా ప్రారంభమైంది. దర్శకుడు బొమ్మరిల్లు భాస్కర్‌, గేయ రచయిత సుద్దాల అశోక్‌ తేజ అతిథులుగా హాజరయ్యారు. ఈ సినిమాలో శిల్పా మంజునాథ్‌, రియా సచ్‌దేవ తదితరులు కీలక పాత్రలు పోషిస్తున్నారు. క్రైమ్‌ థ్రిల్లర్‌ నేపథ్యంలో ఈ సినిమా తెరకెక్కుతుందని, ఈ నెల 14 నుంచి రెగ్యులర్‌ షూటింగ్‌ ప్రారంభిస్తామని దర్శకనిర్మాతలు తెలిపారు.