Tom Cruise: సినిమాను హిట్‌ చేసినందుకు విమానం నుంచి దూకుతూ థ్యాంక్స్‌ చెప్పిన స్టార్‌ హీరో

హైదరాబాద్‌: తన సినిమాను సూపర్‌ హిట్‌ చేసినందుకు అభిమానులకు వినూత్నరీతిలో కృతజ్ఞతలు చెప్పాడో స్టార్‌ హీరో. ఏకంగా విమానంలో నుంచి కిందకు దూకుతూ థ్యాంక్స్‌ చెప్పాడు. టామ్‌ క్రూజ్(Tom Cruise)‌.. హాలీవుడ్‌ ప్రేక్షకులు ఎంతగానో అభిమానించే స్టార్‌ హీరో. ఆయన నటించిన ‘టాప్‌ గన్‌:మెవరిక్‌’(Top Gun: Maverick) చిత్రం భారీ విజయాన్ని సొంతం చేసుకుని కాసుల వర్షం కురిపించింది. ఇంత హిట్‌ను అందించిన ప్రేక్షకులకు స్టంట్‌ చేస్తూ థ్యాంక్స్‌ చెప్పాడు టామ్‌ క్రూజ్. తన అభిమానుల కోసం ఇలా చేసినట్లు స్పష్టం చేశాడు.  ప్రస్తుతం ఈ వీడియో నెట్టింట వైరల్‌గా మారింది. 

‘నేను ప్రస్తుతం దక్షిణాఫ్రికాలో షూటింగ్‌లో ఉన్నాను. ఇటీవల నేను నటించిన టాప్‌ గన్‌ సినిమాను ఆదరించిన వాళ్లందరికీ ధన్యవాదాలు. మిమ్మల్ని అలరించేందుకు నేను ఎప్పుడూ ముందుంటాను. ఇది నాకు జీవితకాల గౌరవం. నేను ప్రస్తుతం ఎంతో ఎత్తులో ఉన్నాను. త్వరలోనే మరో సినిమాతో మీ ముందుకు రానున్నా’ అంటూ విమానం నుంచి కిందకు దూకుతూ వీడియో రికార్డు చేశాడు. ఈ హీరో చేసిన విన్యాసాన్ని చూసి అభిమానులు షాక్‌ అయ్యారు. కామెంట్ల రూపంలో వాళ్ల అభిప్రాయాన్ని తెలియజేస్తున్నారు. ‘ఇటువంటి విన్యాసాలు చేయడంలో మీకు మీరే సాటి’ అని ఒకరు అనగా, ‘రియల్‌ హీరో’ అంటూ మరొకరు కామెంట్‌ చేశారు.