RRR: ‘ఆర్‌ఆర్‌ఆర్‌’కు ఫిదా అయిన స్పైడర్‌ మ్యాన్‌.. అద్భుతంగా ఉందంటూ ప్రశంసలు

ఇంటర్నెడ్‌ డెస్క్‌: ‘ఆర్‌ఆర్‌ఆర్‌’తో చరిత్ర సృష్టించాడు రాజమౌళి. తన ప్రతిభతో ప్రపంచ దేశాల ప్రముఖుల నుంచి ప్రశంసలు అందుకున్నాడు. ఈ సినిమా బాక్సాఫీస్‌ వద్ద భారీ వసూళ్లు సాధించడమే కాకుండా ప్రతిష్ఠాత్మకమైన అవార్డులను కూడా సొంతం చేసుకుంది. ఇక ఈ చిత్రం గురించి ఇప్పటికే చాలా మంది హాలీవుడ్‌ ప్రముఖులు మాట్లాడారు. తాజాగా ‘స్పైడర్‌ మ్యాన్‌’ హీరో టామ్‌ హాలండ్‌ (Tom Holland) కూడా ఈ లిస్ట్‌లో చేరారు. ఇటీవల ఓ ఇంటర్వ్యూలో మాట్లాడిన ఆయన ‘ఆర్‌ఆర్‌ఆర్‌’ చిత్రాన్ని ప్రశంసించారు. దీనికి సంబంధించిన వీడియో ప్రస్తుతం ఇంటర్నెట్‌లో వైరలవుతోంది. 

ఇటీవల ముంబయిలో జరిగిన నీతా ముకేశ్‌ అంబానీ కల్చరల్‌ సెంటర్‌ (NMACC) ప్రారంభోత్సవానికి టామ్‌ హాలండ్‌ వచ్చారు. మూడు రోజుల పాటు భారత్‌లోనే ఉన్నారు. తాజాగా ఓ ఇంటర్వ్యూలో ఆయన మాట్లాడుతూ భారత్‌ పర్యటన గురించి చెప్పారు. అందులోనే ‘ఆర్‌ఆర్‌ఆర్‌’ (RRR) గురించి కూడా ప్రస్తావించారు. ‘‘నాకు భారత్‌ పర్యటన ఎన్నో మంచి జ్ఞాపకాలనిచ్చింది. ఆ పర్యటనను జీవితంలో మర్చిపోలేను. మళ్లీ  భారత్‌కు వెళ్లాలనుకుంటున్నాను. మూడు రోజుల్లో ఎంతో మంది ప్రముఖులను కలిశాను. ఒక్క మాటలో చెప్పాలంటే అద్భుతంగా గడిచింది. అలాగే ఈ మధ్యనే నేను ‘ఆర్‌ఆర్‌ఆర్‌’ చూశాను. ఆ సినిమా చాలా బాగుంది. నాకెంతో నచ్చింది’’ అని చెప్పారు. దీంతో రాజమౌళి అభిమానులు ఈ వీడియోను తెగ షేర్‌ చేస్తున్నారు. 

ఇక రాజమౌళి (Rajamouli) ప్రస్తుతం మహేశ్‌ (Mahesh babu) సినిమా పనుల్లో బిజీగా ఉన్నారు. ఈ ఏడాది చివర్లో లేదా వచ్చే సంవత్సరం ప్రారంభంలో ఈ సినిమా చిత్రీకరణ ప్రారంభమయ్యే అవకాశం ఉంది. దీని కోసం సినీ ప్రియులంతా ఎదురుచూస్తున్నారు.