Friday Movies: ఈ శుక్రవారం బాక్సాఫీస్‌ దగ్గర ముగ్గురి పోటీ..!

హైదరాబాద్‌: ఈ శుక్రవారం టాలీవుడ్‌ బాక్సాఫీస్‌ వద్ద మూడు సినిమాలు పోటీ పడనున్నాయి. ‘కృష్ణ వ్రింద విహారి’, ‘అల్లూరి’, ‘దొంగలున్నారు జాగ్రత్త’ ఈ మూడు సినిమాలు ప్రేక్షకులను అలరించేందుకు సిద్ధమయ్యాయి. కథల ఎంపికలో కొత్తదనం చూపించే శ్రీ విష్ణు కథానాయకుడిగా ప్రదీప్‌ వర్మ దర్శకత్వంలో నటించిన చిత్రం ‘అల్లూరి’. ఈ సినిమాలో శ్రీవిష్ణు సరసన కయాదు లోహార్‌ నటిస్తోంది. పోలీసు అధికారి బయోపిక్‌గా వస్తున్న ఈ సినిమా ప్రమోషన్స్‌లో హీరో అల్లుఅర్జున్‌ కూడా భాగమయ్యారు. దీంతో ఈ సినిమాపై ప్రేక్షకులు ఆశలు పెట్టుకున్నారు. ఇక రొమాంటిక్‌ కామెడీ ఎంటర్‌టైనర్‌గా రానున్న నాగశౌర్య సినిమా ‘కృష్ణ వ్రింద విహారి’. అనిష్‌ ఆర్‌ కృష్ణ దర్శకత్వం వహించిన ఈ సినిమాలో షిర్లీ సేథియా కథానాయిక. ఆద్యంతం వినోదాత్మకంగా ఉండనున్న ఈ చిత్రంలో నాగశౌర్య, షిర్లీల కెమిస్ట్రీ ప్రధాన ఆకర్షణగా నిలవనుంది. ప్రముఖ సంగీత దర్శకుడు కీరవాణి కొడుకు శ్రీసింహా ప్రధాన పాత్రలో థ్రిల్లర్‌ కథతో రూపొందిన చిత్రం ‘దొంగలున్నారు జాగ్రత్త’. ఈ సినిమాలో శ్రీసింహా సరసన ప్రీతి అస్రానీ నటించింది. ఈ సినిమా ఫస్ట్‌లుక్‌, పోస్టర్‌లు సినిమాపై ఆసక్తిని పెంచేవిధంగా ఉన్నాయి. రానున్న శుక్రవారం ఈ మూడు సినిమాలు డిఫరెంట్‌ జోనర్లతో ప్రేక్షకులను అలరించనున్నాయి.