Tollywood: రంగంలోకి దిగిన చిరంజీవి.. ‘ఎఫ్‌ 3’ డబ్బు పాట!

ఇంటర్నెట్‌ డెస్క్‌: ఇటీవల కరోనా బారిన పడిన ప్రముఖ నటుడు చిరంజీవి పూర్తిగా కోలుకున్నారు. రెట్టింపు ఉత్సాహంతో సినిమా షూటింగ్‌లో పాల్గొన్నారు. సోషల్‌ మీడియా వేదికగా ఆయన ఈ విషయాన్ని తెలియజేశారు. తాను త్వరగా కోలుకోవాలని ఆకాంక్షించిన వారందరికీ ధన్యవాదాలు తెలిపారు. ‘‘నాకు కొవిడ్‌ నెగెటివ్‌గా నిర్ధారణ అయింది. ఎంతో ఉత్సాహంతో మళ్లీ పని మొదలుపెట్టా’’ అంటూ ‘గాడ్‌ ఫాదర్’ సినిమా సెట్స్‌లో దిగిన ఫొటోల్ని షేర్‌ చేశారు. పొలిటిక్‌ యాక్షన్ థ్రిల్లర్‌గా రూపొందుతున్న ఈ సినిమాని మోహన్‌రాజా తెరకెక్కిస్తున్నారు. మలయాళంలో ఘన విజయం సాధించిన ‘లూసిఫర్‌’ రీమేక్‌గా ఈ సినిమా రూపొందుతోంది. సత్యదేవ్‌ కీలక పాత్ర పోషిస్తున్నారు. కొణిదెల ప్రొడక్షన్స్‌, సూపర్‌ గుడ్‌ ఫిల్మ్స్‌, ఎన్వీఆర్‌ సినిమా సంస్థలు సంయుక్తంగా నిర్మిస్తున్న ఈ సినిమాకి తమన్‌ సంగీతం అందిస్తున్నారు. కొరటాల శివ దర్శకత్వంలో చిరంజీవి నటించిన ‘ఆచార్య’ చిత్రం ఏప్రిల్ 29న ప్రేక్షకుల ముందుకురానుంది.

 లబ్‌డబ్‌ లబ్‌డబ్‌ డబ్బు.. 

వెంకటేశ్‌, వరుణ్‌ తేజ్‌ కథానాయకులుగా అనిల్‌ రావిపూడి తెరకెక్కిస్తున్న చిత్రం ‘ఎఫ్ 3’. గతంలో ఇదే కాంబినేషన్‌లో వచ్చిన ‘ఎఫ్‌ 2’కి సీక్వెల్‌గా రూపొందుతోంది. తమన్నా, మెహరీన్‌ కథానాయికలు. ఈ సినిమా ఏప్రిల్‌ 28న ప్రేక్షకుల ముందుకుతీసుకొస్తున్న నేపథ్యంలో చిత్ర బృందం ప్రచారాన్ని ప్రారంభించింది. ఈ క్రమంలో ‘లబ్‌డబ్‌ లబ్‌డబ్‌ డబ్బు’ అనే పాటకు సంబంధించి ప్రోమోను ఆదివారం విడుదల చేసింది. భాస్కరభట్ల రచించిన ఈ గీతాన్ని రామ్‌ మిర్యాల ఆలపించారు. దేవిశ్రీ ప్రసాద్‌ స్వరాలు సమకూర్చారు. పూర్తి పాట ఫిబ్రవరి 7న విడుదలకానుంది.