Upendra: ఉపేంద్రకు అనారోగ్యమంటూ వార్తలు.. స్పందించిన నటుడు

ఇంటర్నెట్‌డెస్క్‌: తన ఆరోగ్య పరిస్థితిపై సోషల్‌మీడియా, పలు వెబ్‌సైట్లలో వస్తోన్న వార్తల గురించి ప్రముఖ నటుడు ఉపేంద్ర (Upendra) స్పందించారు. తాను ఆరోగ్యంగానే ఉన్నానని స్పష్టం చేశారు. ఈ మేరకు తన తదుపరి సినిమా సెట్‌ నుంచి ఓ వీడియో షేర్‌ చేశారు. ‘యూఐ’ సినిమా షూట్‌లో బిజీగా ఉన్న ఉపేంద్ర.. గురువారం సాయంత్రం అస్వస్థతకు గురయ్యారని, శ్వాస తీసుకోవడంలో ఇబ్బందులు పడ్డారని, చిత్రబృందం ఆయన్ని స్థానిక ఆస్పత్రికి తరలించిందని పేర్కొంటూ పలు వార్తలు బయటకు వచ్చాయి. దీంతో ఆందోళనకు గురైన ఆయన అభిమానులు ‘గెట్‌ వెల్‌ సూన్‌’ అంటూ నెట్టింట పోస్టులు పెట్టారు. ఈ నేపథ్యంలోనే ఉపేంద్ర తాజాగా వీడియో షేర్‌ చేశారు. షూట్‌ చేస్తోన్న లొకేషన్‌లో దుమ్ము ఎక్కువగా ఉండటంతో కాస్త ఇబ్బందికి గురయ్యానని.. దగ్గరలోని ఆస్పత్రికి వెళ్లి వచ్చానని ఆయన వివరించారు. ‘రా’, ‘ఉపేంద్ర’, ‘సన్నాఫ్‌ సత్యమూర్తి’ వంటి చిత్రాలతో ఆయన తెలుగు వారికీ సుపరిచితులయ్యారు. ప్రస్తుతం ఆయన ‘కబ్జా’, ‘త్రిశూలం’, ‘యూఐ’ చిత్రాల్లో నటిస్తున్నారు.