Urvashi Rautela: ‘బ్రో’ కోసం ఊర్వశి?

పవన్‌ కల్యాణ్‌ (Pawan Kalyan).. ఆయన మేనల్లుడు సాయిధరమ్‌ తేజ్‌ ‘బ్రో’ (BRO)తో సందడి చేసేందుకు సిద్ధమవుతున్నారు. ఈ ఇద్దరూ కలిసి నటిస్తున్న ఈ చిత్రాన్ని సముద్రఖని తెరకెక్కిస్తున్న సంగతి తెలిసిందే. దీన్ని జీ స్టూడియోస్‌తో కలిసి టీజీ విశ్వప్రసాద్‌ నిర్మిస్తున్నారు. ప్రస్తుతం ఈ సినిమా ముగింపు దశ చిత్రీకరణలో ఉన్న సంగతి తెలిసిందే. ఈ వారంలో పవన్‌, సాయితేజ్‌లపై ఓ పబ్‌ సాంగ్‌ను చిత్రీకరించేందుకు సన్నాహాలు చేస్తున్నారు. ఈ ప్రత్యేక గీతం కోసం బాలీవుడ్‌ భామ ఊర్వశి రౌతేలాను ఎంపిక చేశారని సమాచారం. దీనికోసం ఇప్పటికే ఓ పబ్‌ సెట్‌ను సిద్ధం చేసినట్లు తెలిసింది. ఈ గీతానికి గణేష్‌, భాను నృత్య దర్శకులుగా వ్యవహరించనున్నట్లు తెలుస్తోంది. ఈ చిత్రం జులై 28న ప్రేక్షకుల ముందుకు రానుంది.

రయ్‌.. రయ్‌.. ఓజి

పవన్‌ కల్యాణ్‌ - సుజీత్‌ కలయికలో తెరకెక్కుతోన్న ‘ఓజి’ (వర్కింగ్‌ టైటిల్‌) (OG) సెట్స్‌పై శరవేగంగా ముస్తాబవుతోంది. ఈ సినిమా ఇప్పటికే ముంబయి, పుణె పరిసర ప్రాంతాల్లో తొలి షెడ్యూల్‌ను.. ఆ తర్వాత హైదరాబాద్‌లో రెండో షెడ్యూల్‌ను పూర్తి చేసుకున్న సంగతి తెలిసిందే. ఇప్పుడీ మూడో షెడ్యూల్‌ భాగ్యనగరంలోనే ఆదివారం నుంచి ప్రారంభమైంది. ఈ విషయాన్ని చిత్రవర్గాలు సామాజిక మాధ్యమాల వేదికగా వెల్లడించాయి. ప్రస్తుతం ప్రధాన తారాగణంపై పలు కీలక సన్నివేశాల్ని తెరకెక్కిస్తున్నట్లు తెలిసింది. మరికొన్ని రోజుల్లో పవన్‌ కూడా సెట్స్‌లోకి అడుగు పెట్టనున్నారు. యాక్షన్‌ ఎంటర్‌టైనర్‌గా ముస్తాబవుతున్న ఈ చిత్రంలో పవన్‌ గ్యాంగ్‌స్టర్‌గా కనిపించనున్నారని సమాచారం. ఆయనకు జోడీగా ప్రియాంక మోహన్‌ నటిస్తోంది. సంగీతం: తమన్‌, ఛాయాగ్రహణం: రవి కె.చంద్రన్‌.