Urvasivo Rakshasivo: ఇంట్లో బుద్ధిమాన్‌.. వీధిలో శక్తిమాన్‌

అల్లు శిరీష్‌ (Allu Sirish), అను ఇమ్మానుయేల్‌ (Anu Emmanuel) జంటగా రాకేష్‌ శశి తెరకెక్కించిన చిత్రం ‘ఊర్వశివో రాక్షసివో’ (Urvasivo Rakshasivo). ధీరజ్‌ మొగిలినేని నిర్మాత. అల్లు అరవింద్‌ సమర్పిస్తున్నారు. ఈ సినిమా నవంబరు 4న విడుదల కానుంది. ఈ నేపథ్యంలోనే గురువారం చిత్ర టీజర్‌ విడుదల చేశారు. ‘‘కొన్ని విషయాలు మనం ఎంత ట్రై చేసినా జరగవు.. ఒక్కోసారి అనుకోకుండానే జరిగిపోతాయి. అలాంటప్పుడు అది మళ్లీ మళ్లీ జరిగితే బాగుండు అనిపిస్తుంది’’ అంటూ శిరీష్‌ చెబుతున్న డైలాగ్‌తో మొదలైన టీజర్‌ ఆద్యంతం రొమాంటిక్‌గా సాగింది. సినిమాలో ప్రేమకు, స్నేహానికి మధ్య ఉన్న తేడాను దర్శకుడు చర్చించినట్లు అర్థమవుతోంది. యువతరం కోరుకునే అన్ని అంశాలు ఇందులో పుష్కలంగా ఉన్నట్లు కనిపిస్తోంది. ‘‘నువ్వు మామూలోడివి కాదు రాజా.. ఇంట్లో బుద్ధిమాన్‌.. వీధిలో శక్తిమాన్‌’’ అంటూ టీజర్‌లో శిరీష్‌ పాత్ర గురించి పోసాని కృష్ణమురళి పేల్చిన డైలాగ్‌ హైలైట్‌గా నిలిచింది.