Vaishnav Tej: యాక్షన్‌ రోల్‌లో వైష్ణవ్‌.. మరో కొత్త ప్రాజెక్ట్‌లో మెగా హీరో

హైదరాబాద్‌: ‘‘ఈడ ఉండేడిది రాముడు కాదప్ప ఆ రావణుడే కొలిచే రుద్ర కాళేశ్వరుడు’’ అని అంటున్నారు నటుడు వైష్ణవ్‌ తేజ్‌ (Vaishnav Tej). ‘ఉప్పెన’ (Uppena)తో వెండితెరకు ఎంట్రీ ఇచ్చిన ఈ మెగా హీరో వరుస సినిమాలు చేస్తూ ప్రేక్షకుల్ని అలరించేందుకు సిద్ధమయ్యారు. ఇప్పటికే ఆయన నటించిన ‘రంగరంగ వైభవంగా’ విడుదలకు సిద్ధంగా ఉండగా తాజాగా మరో కొత్త ప్రాజెక్ట్‌ని బుధవారం అనౌన్స్‌ చేశారు. శ్రీకాంత్‌ ఎన్‌ రెడ్డి దర్శకత్వంలో ఈ సినిమా తెరకెక్కనుంది. ఫ్యాక్షన్‌, యాక్షన్‌ ఎంటర్‌టైనర్‌గా సిద్ధం కానున్న ఈ సినిమాలో వైష్ణవ్‌ రోల్‌ పవర్‌ఫుల్‌గా ఉండనుంది. సితార ఎంటర్‌టైన్‌మెంట్స్‌ పతాకంపై ఇది రూపుదిద్దుకోనుంది. శ్రీలీలా కథానాయిక. ఈ ప్రాజెక్ట్‌ని ప్రకటిస్తూ సితార ఎంటర్‌టైన్‌మెంట్స్‌ తాజాగా ఓ వీడియో షేర్‌ చేసింది. ‘‘రేయ్‌ రాముడు లంక మీద పడటం వినుంటావు.. అదే పది తలకాయల వాడు అయోధ్య మీద పడితే ఎట్టుంటాదో చూస్తావా’’ అనే డైలాగ్‌లతో సాగిన వీడియో సినిమాపై ఉత్కంఠ రేకేత్తించేలా ఉంది. ఈ సినిమా షూట్‌ త్వరలో ప్రారంభం కానుంది.