Vamshi Paidipally: నా జీవితంలో అతిపెద్ద విజయం ఇదే: వంశీ పైడిపల్లి

హైదరాబాద్‌: తన జీవితంలో అతిపెద్ద విజయాన్ని సొంతం చేసుకున్నానంటున్నారు దర్శకుడు వంశీ పైడిపల్లి (Vamshi Paidipally). కుటుంబంతో కలిసి ‘వారసుడు’ (Vaarasudu) వీక్షించిన ఆయన ఓ స్పెషల్‌ వీడియోను షేర్‌ చేశారు. ఈ సినిమా చూసి వంశీ తండ్రి భావోద్వేగానికి గురి కావడం.. పుత్రోత్సాహంతో ఆయన్ని హత్తుకోవడం వంటి భావోద్వేగ దృశ్యాలతో ఈ వీడియో సాగింది. ‘‘వారసుడు’ వీక్షించి నా తండ్రి ఎంతగానో ఆనందించారు. ఈరోజు నేను నా జీవితంలో అతిపెద్ద విజయాన్ని అందుకున్నాను. జీవితాంతం ఈ క్షణాలను గుర్తుపెట్టుకుంటాను. ‘నాన్నా.. నువ్వే నా హీరో. ఎప్పటికీ ప్రేమిస్తూనే ఉంటా’’ అంటూ వంశీ రాసుకొచ్చారు.

‘మహర్షి’ (Maharshi) వంటి క్లాస్‌ విజయం తర్వాత వంశీ తెరకెక్కించిన పూర్తిస్థాయి తమిళ చిత్రం ‘వారిసు’ (Vaarisu). విజయ్‌ (Vijay) హీరోగా తెరకెక్కిన ఈ చిత్రానికి దిల్‌ రాజు (Dil Raju) నిర్మాతగా వ్యవహరించారు. పూర్తి స్థాయి కుటుంబ కథా చిత్రానికి కమర్షియల్‌ హంగులు జోడించి దీన్ని రూపొందించారు. రష్మిక, జయసుధ, ఖుష్బూ, శరత్‌కుమార్‌, శ్రీకాంత్‌‌, శ్యామ్‌, ప్రకాశ్‌రాజ్‌ కీలకపాత్రలు పోషించారు. కోలీవుడ్‌లో జనవరి 11న విడుదలైన ఈ చిత్రం ఆ రాష్ట్రంలో మంచి టాక్‌ అందుకుంది. ఇక, శనివారం ‘వారసుడు’ పేరుతో ఈ సినిమా రెండు తెలుగు రాష్ట్రాల్లోనూ విడుదలైంది.