Varalaxmi Sarathkumar: పదేళ్ల సినీ ప్రయాణంపై ప్రముఖ నటి ఎమోషనల్‌ పోస్ట్‌..

హైదరాబాద్‌: వైవిధ్య కథలను ఎంచుకుంటూ తనదైన శైలిలో నటిస్తూ మంచి గుర్తింపు తెచ్చుకున్నారు నటి వరలక్ష్మీ శరత్‌ కుమార్‌. తాజాగా యశోద సినిమాలో కనిపించి తన నటనతో ప్రేక్షకులను మెప్పించింది. చిత్రపరిశ్రమకు వచ్చి 10  ఏళ్లు పూర్తయిన సందర్భంగా.. ఈ నటి సోషల్‌మీడియాలో ఓ ఎమోషనల్‌ పోస్ట్‌ పెట్టింది.

‘‘పదేళ్ల క్రితం ఇదే రోజు నా మొదటి సినిమా విడుదలైంది. ఇప్పుడు యశోద సినిమా ప్రేక్షకుల ముందుకు వచ్చి అలరిస్తోంది. ఈ దశాబ్ద కాలం నా ప్రయాణం సులభంగా, అనుకున్న విధంగా సాగిందా అంటే.. కాదనే చెప్పాలి. ఎన్నో తిరస్కరణలకు గురయ్యాను.  అయితే.. ఎన్నో విలువైన విషయాలు నేర్చుకున్నాను. ఎంతో కృషి చేశాను. వెనక్కి తిరిగి చూసుకుంటే 45 సినిమాల్లో నటించి నేనెంటో నిరూపించుకునే అవకాశం ఇచ్చారు. అలాగే నన్ను తిరస్కరించిన ప్రతి ఒక్కరికీ ధన్యవాదాలు’’ అంటూ తనకు మద్దతు ఇస్తూ కష్టకాలంలో అండగా నిలిచిన దర్శక నిర్మాతలకు, కుటుంబసభ్యులకు కృతజ్ఞతలు తెలిపారు.