Varsha Bollamma: నిర్మాత కుమారుడితో పెళ్లి వార్తలు.. స్పందించిన యువ నటి

హైదరాబాద్‌: టాలీవుడ్‌కు చెందిన ఓ నిర్మాత కుమారుడితో నటి వర్ష బొల్లమ్మ (Varsha Bollamma) వివాహం జరగనుందంటూ గత కొన్నిరోజులుగా వార్తలు వస్తోన్న విషయం తెలిసిందే. సోషల్‌మీడియాలో వైరల్‌గా మారిన ఈ వార్తలపై తాజాగా వర్ష స్పందించింది. అవన్నీ వదంతులు మాత్రమేనని చెప్పింది.

తన పెళ్లి గురించి పలు వెబ్‌సైట్స్‌లో వచ్చిన కథనాలను స్క్రీన్‌ షాట్స్‌ తీసి ట్విటర్‌ వేదికగా షేర్‌ చేసిన ఆమె.. ‘‘నాకే తెలియకుండా నాకోసం పెళ్లి చూపులు చూసి ఒక అబ్బాయిని సెలక్ట్‌ చేసినందుకు అన్ని వెబ్‌సైట్స్‌కు ధన్యవాదాలు. ఆ అబ్బాయి ఎవరో చెబితే నేను కూడా మా ఇంట్లో వాళ్లకు పరిచయం చేస్తా. ప్రస్తుతం నా పెళ్లి చూపులు చూడాలంటే ఆహాలో ‘స్వాతిముత్యం’ చూడండి’’ అని పేర్కొంది. ‘చూసీ చూడంగానే’తో టాలీవుడ్‌లోకి ఎంట్రీ ఇచ్చిన ఈ భామ ‘జాను’, ‘మిడిల్‌ క్లాస్‌ మెలోడీస్‌’, ‘పుష్పకవిమానం’, ‘స్టాండప్‌ రాహుల్‌’ చిత్రాలతో అలరించారు. ఆమె హీరోయిన్‌గా నటించిన ‘స్వాతిముత్యం’ ఇటీవల విడుదలై మంచి టాక్‌ అందుకుంది.