Michael: ‘మైఖేల్‌’ కోసం వరుణ్‌..

సందీప్‌ కిషన్‌ కథానాయకుడిగా నటిస్తున్న యాక్షన్‌ ఎంటర్‌టైనర్‌ ‘మైఖేల్‌’. రంజిత్‌ జయకోడి దర్శకుడు. భరత్‌ చౌదరి, పుస్కూర్‌ రామ్‌ మోహన్‌రావు సంయుక్తంగా నిర్మిస్తున్నారు. దివ్యాంశ కౌశిక్‌ కథానాయిక. విజయ్‌ సేతుపతి, వరలక్ష్మి శరత్‌కుమార్‌ ముఖ్య పాత్రలు పోషిస్తున్నారు. ఇప్పుడీ సినిమాలో ఓ కీలక పాత్ర కోసం నటుడు వరుణ్‌ సందేశ్‌ను ఎంపిక చేశారు. ఈ విషయాన్ని చిత్ర బృందం శనివారం సామాజిక మాధ్యమాల వేదికగా ప్రకటించింది. ‘‘ఈ చిత్ర కొత్త షెడ్యూల్‌ శనివారం హైదరాబాద్‌లో ప్రారంభమైంది. ఈ భారీ యాక్షన్‌ ఎంటర్‌టైనర్‌లో గౌతమ్‌ మేనన్‌ ప్రతినాయకుడిగా నటిస్తున్నారు. ఈ చిత్రం తెలుగు, తమిళం, కన్నడ, మలయాళం, హిందీ భాషల్లో ఏకకాలంలో విడుదల కానుంది. దీనికి సంబంధించిన మరిన్ని త్వరలో వెల్లడిస్తాం’’ అని చిత్ర వర్గాలు తెలిపాయి.