Kalyan Ram: బింబిసార2పై అప్‌డేట్‌ ఇచ్చిన డైరెక్టర్‌...

హైదరాబాద్‌: కల్యాణ్‌ రామ్‌ హీరోగా వశిష్ఠ దర్శకత్వంలో తెరకెక్కిన సినిమా ‘బింబిసార’. ఆగస్టులో ప్రేక్షకుల ముందుకు వచ్చిన ఈ చిత్రం మంచి విజయాన్ని సొంతం చేసుకుంది. తాజాగా ఈ సినిమా ఓటీటీలోకి వచ్చి డిజిటల్‌ ప్రేక్షకులను అలరిస్తోంది. ఇక ఈ చిత్రానికి సీక్వెల్‌ ఉంటుందని చిత్రబృందం గతంలో ప్రకటించిన సంగతి తెలిసిందే. దీనిపై దర్శకుడు ఓ ప్రముఖ ఆంగ్ల మీడియా సంస్థతో మాట్లాడారు.

‘‘సోషియో ఫాంటసీ సినిమాగా ప్రేక్షకుల ముందుకు వచ్చిన బింబిసార చిత్రాన్ని అందరూ ఎంతగానో ఆదరించారు. ఊహించని విజయాన్ని అందించారు. ప్రస్తుతం వాళ్లందరూ ఈ సినిమా సీక్వెల్‌ కోసం ఎదురుచూస్తున్నారు.  నేను అభిమానులందరికీ కొత్తదనాన్ని ఇవ్వాలనుకుంటున్నా. వాళ్ల అంచనాలకు తగ్గట్టుగా ఈ సినిమాను రూపొందించనున్నాం. మొదటిభాగం భారీ హిట్‌ సాధించినందున రెండో భాగం దానికి మించి తీయాలనే ఒత్తిడి నాపై ఉంది. కల్యాణ్‌ రామ్‌ తన ప్రాజెక్టులన్నీ పూర్తి చేసుకున్న తర్వాత బింబిసార2 సినిమా షూటింగ్‌ మొదలవుతుంది’’ అని చెప్పారు. ప్రస్తుతం కల్యాణ్‌ రామ్‌ ‘డెవిల్‌’ సినిమాలో నటిస్తున్నారు. నవీన్‌ మేడారం ఈ  చిత్రాన్ని తెరకెక్కిస్తున్నారు. ‘ది బ్రిటిష్ సీక్రెట్‌ ఏజెంట్‌’ అనేది ఉపశీర్షిక. చారిత్రక నేపథ్యంలో సాగే ఈ కథను పాన్‌ ఇండియా స్థాయిలో రూపొందించనున్నారు.