VD11: విజయ్‌-సామ్‌ల ‘ఖుషి’ ఫస్ట్‌ లుక్‌ వచ్చేసింది

హైదరాబాద్‌: సెన్సేషనల్‌ స్టార్‌ విజయ్‌ దేవరకొండ, అగ్ర కథానాయిక సమంత జంటగా ఓ ప్రేమకథా చిత్రం తెరకెక్కుతోన్న సంగతి తెలిసిందే. శివ నిర్వాణ దర్శకుడు. ఇటీవల ప్రారంభమైన ఈ సినిమా చిత్రీకరణ గత కొన్నిరోజుల నుంచి కశ్మీర్‌లోని పలు అందమైన లొకేషన్స్‌లో జరుగుతోంది. తాజాగా సినిమా నుంచి ఓ స్పెషల్‌ సర్‌ప్రైజ్‌ని సోమవారం ఉదయం చిత్రబృందం అభిమానులతో పంచుకుంది. యూత్‌ఫుల్‌ లవ్‌ ఎంటర్‌టైనర్‌గా సిద్ధమవుతోన్న ఈ చిత్రానికి ‘ఖుషి’ అనే టైటిల్‌ని ఖరారు చేసినట్లు ప్రకటించింది. దీనికి సంబంధించిన ఫస్ట్‌లుక్‌ పోస్టర్‌ని సైతం విడుదల చేసింది. ఇందులో విజయ్‌ ఫుల్‌ స్టైలిష్‌ లుక్‌లో.. సామ్‌ సంప్రదాయ దుస్తుల్లో కనిపించారు. పోస్టర్‌ని బట్టి చూస్తే ఈ సినిమా కశ్మీర్‌ నేపథ్యంలో సాగే ప్రేమకథతో రూపుదిద్దుకున్నట్లు తెలుస్తోంది. తెలుగు, తమిళం, కన్నడ, మలయాళంలో ఈ ఏడాది డిసెంబర్‌ 23న ఈచిత్రాన్ని విడుదల చేయనున్నట్లు ప్రకటించింది. మైత్రి మూవీ మేకర్స్‌ పతాకంపై ఈ సినిమా రూపుదిద్దుకుంటోంది.