Custody: ‘శివ’ టైటిల్‌ని నాగచైతన్య వద్దనడానికి కారణమదే: దర్శకుడు వెంకట్‌ ప్రభు

హైదరాబాద్‌: ‘రాక్షసుడు’, ‘మానాడు’ తదితర డబ్బింగ్‌ చిత్రాలతో తెలుగు ప్రేక్షకులను అలరించిన దర్శకుడు.. వెంకట్‌ ప్రభు (Venkat Prabhu). ఈసారి అనువాదంతో కాకుండా స్ట్రయిట్‌ ఫిల్మ్‌తోనే టాలీవుడ్‌ ఎంట్రీ ఇస్తున్నారాయన. ఆ సినిమానే ‘కస్టడీ’ (Custody). నాగచైతన్య (Naga Chaitanya), కృతిశెట్టి (Krithi Shetty) హీరోహీరోయిన్లు. ప్రియమణి, అరవిందస్వామి, శరత్‌కుమార్‌ కీలక పాత్రలు పోషించిన ఈ సినిమా మే 12న విడుదల కానుంది. ఈ సందర్భంగా వెంకట్‌ ప్రభు తెలుగు మీడియాతో ముచ్చటించారు. ఆయన పంచుకున్న విశేషాలివీ..

* ‘కస్టడీ’ ఎలా మొదలైయింది?

వెంకట్‌ ప్రభు: కొవిడ్‌ సమయంలో ఈ కథని రాశా. మలయాళ సినిమా ‘నాయట్టు’ దానికి స్ఫూర్తి. అయితే, ఆ చిత్రంలో కమర్షియల్‌ హంగులు ఉండవు. తెలుగు, తమిళ్‌ ఆడియన్స్‌కు ఆ అంశాలు నచ్చుతాయి కాబట్టి వాటిని జోడించా. పెద్ద ఆశయంతో జీవనం సాగించే కానిస్టేబుల్‌ కథని ఈ సినిమా ద్వారా చెప్పబోతున్నా. ‘లవ్‌స్టోరి’ సినిమాలోని ఓ పాటలో నాగచైతన్య నటన నాకు బాగా నచ్చింది. నేను రాసుకున్న కానిస్టేబుల్‌ శివ పాత్రకు ఆయనైతే బాగుంటారని అనిపించి, ఆయన్ను కలిసి కథ వినిపించా. ఆయనకు నేను చెప్పిన స్క్రిప్టు నచ్చడంతో సినిమా చేసేందుకు అంగీకరించారు.

* ఇందులో ప్రేమకథ ఉంటుందా

వెంకట్‌ ప్రభు: కానిస్టేబుల్‌ శివది చిన్న పట్టణం. తనకు కుటుంబం ఉంటుంది. ప్రేమకథా ఉంటుంది. అతడికి ఎదురైన ఓ సమస్యతో ప్రారంభమయ్యే సినిమా ప్రీ ఇంటర్వెల్‌ నుంచి క్లైమాక్స్‌ వరకు థ్రిల్‌ పంచుతుంది. ఇది యూనివర్సల్‌ సబ్జెక్ట్‌. అందరూ ఎంజాయ్‌ చేస్తారు.

* ఈ సినిమాకి ‘శివ’ అనే టైటిల్ పరిశీలించారా ?

వెంకట్‌ ప్రభు: నేను నాగార్జునగారు నటించిన ‘శివ’ సినిమాకి పెద్ద అభిమానిని. ఆయన తనయుడైన చైతన్యతో సినిమా చేస్తుండడం, అందులోని హీరో పాత్ర పేరు శివ కావడంతో అదే టైటిల్‌ పెట్టాలని అనుకున్నా. అయితే, ‘అది క్లాసిక్‌ సినిమా. ఆ పేరు పెడితే ఆ సినిమాతో ఈ సినిమాని పోల్చి చూస్తుంటారు’ అని చైతన్య వద్దన్నారు.

* నాగచైతన్య, కృతిశెట్టి ఎలా నటించారు?

వెంకట్‌ ప్రభు: నాగచైతన్య అద్భుతమైన నటుడు. ప్రేక్షకులు ఈ సినిమాలో కొత్త చైతన్యను చూస్తారు. హీరోలని విభిన్నంగా చూపించేందుకు నేను ఇష్టపడతా. కృతిశెట్టి.. రేవతి పాత్రలో ఒదిగిపోయింది. ఆ రోల్‌ కథలో కీలకం.

* అరవిందస్వామి ఎంపిక గురించి చెబుతారా?

వెంకట్‌ ప్రభు: హీరో కంటే మరో పవర్‌ఫుల్‌ పాత్ర కోసం ఎవరైతే బాగుంటారా? అని అన్వేషిస్తుండగా అరవిందస్వామి గుర్తొచ్చారు. ఆయన్ను సంప్రదించి విషయం చెబితే నటించేందుకు గ్రీన్‌ సిగ్నల్‌ ఇచ్చారు. శరత్‌కుమార్‌ మరో కీలక పాత్ర పోషించారు.

* సంగీతం ఎలాంటి పాత్ర పోషించింది?

వెంకట్‌ ప్రభు: ఇప్పటికే విడుదలైన ట్రైలర్‌లో నేపథ్య సంగీతాన్ని మీరు వినే ఉంటారు. ఇళయరాజా, యువన్‌ శంకర్‌రాజా తమ సంగీతంతో సినిమాని మరోస్థాయికి తీసుకెళ్లారు. ఈ సినిమాకి మ్యూజిక్‌ ప్రధాన బలం.

* రెండు భాషల్లో తెరకెక్కించిన అనుభవం గురించి వివరిస్తారా?

వెంకట్‌ ప్రభు: శారీరకంగా, మానసికంగా అది చాలా కష్టమైన పని. ప్రతి షాట్‌ రెండు సార్లు తీయాలి. సంభాషణలు, పాటలు, సెన్సార్‌.. ఇలా ప్రతి విషయంలో రెండు సార్లు వర్క్‌ చేయడమంటే రెండు సినిమాలు తీసినట్టే.

* మీ గత చిత్రం ‘మానాడు’లో పాలిటిక్స్‌ గురించి ప్రస్తావించారు. ‘కస్టడీ’లో ముఖ్యమంత్రి పాత్ర చూపించారు? ఇదేమైనా యూనివర్సా? 

వెంకట్‌ ప్రభు: లేదండీ. కోలీవుడ్‌లోనూ ఇదే ప్రశ్న ఎదురైంది. ‘కస్టడీ’ ప్రపంచం వేరు, ‘మానాడు’ ప్రపంచం వేరు. రెండింటికీ సంబంధం ఉండదు.

* తదుపరి చిత్రాలు?

వెంకట్‌ ప్రభు: ఓ పెద్ద ప్రాజెక్టు చేయబోతున్నా. దాని వివరాలు త్వరలో చెబుతా.