Vignesh Shivan: ఆ జోడీ కుదరనట్టేనా.. ట్విటర్‌ నుంచి పేరు తీసేసిన విఘ్నేశ్‌ శివన్‌

చెన్నై‌: విభిన్నమైన కథలతో తరచూ ప్రేక్షకులను అలరిస్తుంటారు దర్శకుడు విఘ్నేశ్‌ శివన్ (Vignesh Shivan)‌. తాజాగా ఆయన చేసిన ఓ పని ఇప్పుడు సినీ ప్రియులను షాక్‌కు గురి చేసింది. ఆయన అలా చేయడానికి కారణం ఏమై ఉంటుంది? అని నెటిజన్లు మాట్లాడుకుంటున్నారు. ఇంతకీ ఆయన ఏం చేశారంటే..!

గతేడాది విడుదలైన ‘కాతువాకుల రెండు కాదల్‌’తో ప్రేక్షకులను అలరించారు విఘ్నేశ్. ఈ సినిమా తర్వాత తన తదుపరి ప్రాజెక్ట్‌ను స్టార్‌ హీరో అజిత్‌(Ajith)తో చేస్తున్నట్లు ఓ సందర్భంలో చెప్పారు. అజిత్‌ 62(AK 62)వ చిత్రంగా లైకా ప్రొడెక్షన్స్‌ పతాకంపై ఇది పట్టాలెక్కనున్నట్లు గతంలో ప్రకటన విడుదలైంది. ఈ ప్రాజెక్ట్‌ పట్టాలెక్కే రోజు కోసం అజిత్‌ అభిమానులు ఆశగా ఎదురుచూస్తోన్న తరుణంలో విఘ్నేశ్‌ ఈ సినిమా నుంచి వైదొలగినట్లు ఇటీవల వార్తలు వచ్చాయి. తాజాగా విఘ్నేశ్‌ శివన్‌ సైతం తన ట్విటర్‌ బయో నుంచి AK 62 అనే పేరును తొలగించారు. దీంతో ఈ సినిమా గురించి ఇప్పటివరకూ వచ్చిన వార్తలు నిజమేనని అభిమానులు భావిస్తున్నారు. ఈ జోడీ ఇప్పటికి కుదరనట్టేనా? అని మాట్లాడుకుంటున్నారు. మరోవైపు  అజిత్‌ - విఘ్నేశ్‌ శివన్‌ ప్రాజెక్ట్ కొనసాగుతుందా? లేదా? అనే విషయంపై నిర్మాణ సంస్థ నుంచి అధికారిక ప్రకటన వెలువడాల్సి ఉంది.