Vijay Devarakonda: మహేశ్‌ స్థానాన్ని రీప్లేస్‌ చేస్తోన్న విజయ్‌..!

పూరీ డ్రీమ్‌ ప్రాజెక్ట్‌కి ‘లైగర్‌’ గ్రీన్‌ సిగ్నల్‌...!

హైదరాబాద్‌: ‘పోకిరి’, ‘బిజినెస్‌ మెన్‌’ చిత్రాలతో హిట్స్‌ అందుకున్నారు పూరీ జగన్నాథ్‌-మహేశ్‌బాబు. రెండు విజయాల అనంతరం వీరిద్దరూ తమ హ్యాట్రిక్‌ ప్రాజెక్ట్‌గా కొన్నేళ్ల క్రితం ‘జన గణ మన’ ప్రకటించిన విషయం తెలిసిందే. ఓ పవర్‌ఫుల్‌ కథాంశంతో ఈ సినిమా తెరకెక్కనున్నట్లు అప్పట్లో పూరీ తెలిపారు. ఇది తన కలల ప్రాజెక్ట్‌ అని.. మహేశ్‌ని మునుపెన్నడూ చూడని విధంగా ఈ సినిమాలో చూస్తారని చెప్పుకొచ్చారు. అయితే అనుకోని కారణాల వల్ల ఈ సినిమాకు ఆదిలోనే ఎండ్‌ కార్డు పడింది. దీంతో ఆనాటి నుంచి ‘జన గణ మన’ సినిమా కోసం సినీ ప్రియులందరూ ఎంతో ఆసక్తిగా ఎదురుచూస్తున్నారు. పూరీ-పవన్‌ కాంబోలో ఇది తెరకెక్కే అవకాశం ఉందని కొన్నిసార్లు వార్తలూ వచ్చాయి.

కాగా, తాజాగా వస్తోన్న సమాచారం ప్రకారం ఇంతకాలంగా నిలిచిపోయిన తన కలల ప్రాజెక్ట్‌ని ఇప్పుడు మళ్లీ పట్టాలెక్కించాలనే ఉద్దేశంలో పూరీ ఉన్నట్లు తెలుస్తోంది. విజయ్‌ దేవరకొండ ఈ సినిమాలో హీరోగా నటించే అవకాశం ఉందట. ఇప్పటికే ‘లైగర్‌’తో ప్రేక్షకుల్ని అలరించేందుకు సిద్ధమైన పూరీ-విజయ్ మరోసారి ఈ ప్రాజెక్ట్‌ కోసం కలిసి పనిచేయనున్నారట. పూరీ చెప్పిన కథ నచ్చడంతో విజయ్‌ వెంటనే ఓకే చేశారని టాక్‌. ఇదిలా ఉండగా, ఆదివారంతో ‘లైగర్‌’ షూట్‌ పూర్తైంది. ఈ విషయాన్ని తెలియజేస్తూ పూరీ ఓ వాయిస్‌ నోట్‌ షేర్‌ చేశారు. ‘ఇప్పుడే లైగర్‌ షూట్‌ పూర్తైంది. ఈరోజుతో జన గణ మన’ అని ఆయన చెప్పుకొచ్చారు. ఈ ఆడియో విన్న వారు విజయ్‌-పూరీ కాంబోలో త్వరలో ‘జన గణ మన’ వచ్చేస్తోంది అని కామెంట్లు చేస్తున్నారు.