Vijay Devarakonda: పాములతో ఆడుతూ.. పులి పిల్లలకు పాలు పడుతూ.. రౌడీ హీరో వీడియో వైరల్‌

హైదరాబాద్‌: తన సినిమాలతో యూత్‌లో క్రేజ్‌ను సొంతం చేసుకున్నాడు విజయ్‌ దేవరకొండ(Vijay Devarakonda). అభిమానులు రౌడీ హీరో అని పిలుచుకునే విజయ్‌కు సంబంధించిన ఓ వార్త ప్రస్తుతం నెట్టింట హల్‌చల్‌ అవుతోంది. సాధారణంగా షూటింగ్‌ విరామ సమయాల్లో విహార యాత్రలకు వెళ్తూ ఆ ఫొటోలను అభిమానులతో పంచుకుంటుటాడు విజయ్‌. తాజా టూర్‌కు సంబంధించిన వీడియోను విజయ్‌ తన సోషల్‌మీడియాలో పోస్ట్‌ చేశాడు. ఇది చూసిన అభిమానులు ‘‘ఇది విహార యాత్ర కాదు.. సాహస యాత్ర’’ అంటూ కామెంట్స్‌ పెడుతున్నారు.

ఇటీవల విజయ్‌ తన కుటుంబంతో కలిసి దుబాయ్‌ ట్రిప్‌కు వెళ్లారు. అక్కడ ఉన్న జంతువులతో సరదాగా గడిపారు. దానికి సంబంధించిన వీడియోను పోస్ట్‌ చేస్తూ.. ‘‘జీవితంలో మరో అందమైన జ్ఞాపకం. ఈ పార్కులో వాళ్లు నాకు పాములంటే ఉన్న భయాన్ని పోగొట్టారు. జంతువుల గురించి ఎన్నో విషయాలు చెప్పారు. అందమైన సింహం, పులి పిల్లలతో ఆడుకోవడానికి అవకాశం ఇచ్చారు’’ అని రాశాడు. ప్రస్తుతం ఈ వీడియో వైరల్‌ అవుతుండగా.. నెటిజన్లు ఆసక్తికర కామెంట్స్‌ చేస్తున్నారు. ‘జాగ్రత్త అన్న’ అని ఒకరు అంటే..‘నిజంగానే రౌడీ హీరోవి నువ్వు’ అని మరొకరు కామెంట్స్‌ చేస్తున్నారు.

ఇక సినిమాల విషయానికొస్తే.. ప్రస్తుతం విజయ్‌ దేవరకొండ అగ్ర కథానాయిక సమంత (Samantha)తో కలిసి ‘ఖుషి’ (Kushi) సినిమాలో నటిస్తున్నాడు. ఇప్పటికే ఈ సినిమా షూటింగ్‌ 60 శాతం పూర్తయింది. మిగతా చిత్రీకరణ కూడా త్వరలోనే ప్రారంభం కానుంది. దీనితో పాటు పరశురామ్‌ దర్శకత్వంలో ఓ సినిమా చేస్తున్నారు. అలాగే గౌతమ్‌ తిన్ననూరి కథను కూడా విజయ్‌ ఓకే చేశారు.