Vijay: నిజమే విజయ్‌తో నాకు మాటల్లేవు కానీ..

చెన్నై: తనకి తన కుమారుడు విజయ్‌ (Vijay)కు మధ్య గడిచిన ఏడాదిన్నరగా సరిగ్గా మాటల్లేవనే విషయం నిజమేనని నటుడి తండ్రి చంద్రశేఖర్‌ (Chandrasekhar) స్పష్టం చేశారు. అయితే అదేమీ చర్చించుకోవాల్సినంత పెద్ద అంశం కాదని అన్నారు. తండ్రీకొడుకులన్నాక చిన్న చిన్న మనస్పర్థలు రావడం.. తిరిగి కలుసుకోవడం సహజమని తెలిపారు. ఈ మేరకు తాజాగా ఆయన ఓ ఇంటర్వ్యూలో పాల్గొని విజయ్‌ గురించి మాట్లాడారు.

‘‘విజయ్‌కు నేనంటే ఎంతో ఇష్టం. నాతో ఎంతో క్లోజ్‌గా ఉండేవాడు. సినిమాల తర్వాత విజయ్‌కే నేను ప్రాధాన్యత ఇస్తాను. ఆ తర్వాతే నా భార్య. అయితే, కొన్ని విషయాల్లో చిన్న చిన్న మనస్పర్థలు రావడంతో విజయ్‌ నేనూ గడిచిన ఏడాదిన్నర నుంచి సరిగ్గా మాట్లాడుకోవడం లేదు. అయితే, మా దృష్టిలో అదేం పెద్ద విషయం కాదు. మేమిద్దరం గొడవలు పడతాం, తర్వాత మళ్లీ కలుస్తాం. తండ్రీ కొడుకుల బంధంలో ఇలాంటివి సర్వసాధారణం. ఇటీవల మేమంతా కలిసి ‘వారిసు’ సినిమా చూశాం’’ అని చంద్రశేఖర్‌ తెలిపారు. రాజకీయ పార్టీ పరమైన విషయంలో విజయ్‌కి చంద్రశేఖర్‌కు మధ్య వాగ్వాదాలు జరిగాయని.. ఈ వ్యవహారం కాస్తా కోర్టు వరకు వెళ్లినట్లు గతంలో పలు పత్రికల్లో వార్తలు వచ్చాయి. దాంతో వీరిద్దరి మధ్య సత్సంబంధాలు లేవని అభిమానులు మాట్లాడుకుంటున్నారు.