Shalini Pandey: విజయ్‌ దేవరకొండకు థ్యాంక్యూ చెప్పిన షాలినీ పాండే

ఆసక్తికర పోస్ట్‌ పెట్టిన నటి

హైదరాబాద్‌: ‘అర్జున్‌ రెడ్డి’ (Arjun Reddy) కోస్టార్‌ విజయ్‌ దేవరకొండకు (Vijay Deverakonda) నటి షాలినీ పాండే (Shalini Pandey) కృతజ్ఞతలు చెప్పారు. ఆగస్టు 25 తన జీవితంలోనే కీలకమైన రోజంటూ ఆమె పేర్కొన్నారు. ‘‘ఈరోజుకి (ఆగస్టు 25) నా జీవితంలో ఎంతో ప్రాముఖ్యం ఉంది. సుమారు ఐదేళ్ల క్రితం ఇదే రోజున నేను నటిగా వెండితెరకు పరిచయమైన ‘అర్జున్‌ రెడ్డి’ విడుదలై ఎప్పటికీ గుర్తుండిపోయే విజయాన్ని అందించింది. ఆ సినిమాలో నేను పోషించిన ప్రీతి పాత్రకు మీ నుంచి వచ్చిన ప్రేమాభిమానానికి ఎప్పుడూ కృతజ్ఞురాలినే. ‘అర్జున్‌ రెడ్డి’కి నేనెప్పటికీ రుణపడి ఉంటా. దర్శకుడు సందీప్‌రెడ్డి వంగాకు ధన్యవాదాలు. తొలి చిత్రం ఎలా చేస్తానోనని కంగారు పడుతోన్న నాలో ఉత్సాహాన్ని నింపి.. షూటింగ్ సరదాగా గడిచిపోయేలా చేశాడు నా సహనటుడు  విజయ్ దేవరకొండ. ‘లైగర్‌’.. నువ్వు చేసిన ప్రతి పనికి థ్యాంక్యూ. లవ్ యూ. అలాగే నీ కొత్త సినిమా మంచి విజయం అందుకోవాలని కోరుకుంటున్నా’’ అని షాలినీ రాసుకొచ్చారు.

సందీప్‌ రెడ్డి వంగా - విజయ్‌ దేవర కొండ కాంబినేషన్‌లో తెరకెక్కిన రొమాంటిక్‌ చిత్రం ‘అర్జున్‌ రెడ్డి’. షాలినీ పాండే కథానాయిక. 2017లో విడుదలైన ఈ సినిమా బాక్సాఫీస్‌ వద్ద సూపర్‌ సక్సెస్‌ సొంతం చేసుకొంది. కోపాన్ని కంట్రోల్‌ చేసుకోలేని స్టూడెంట్‌గా, ప్రియురాలికి దూరమై, మద్యానికి బానిసైన వ్యక్తిగా విజయ్‌ నటన అందర్నీ ఆకట్టుకొంది. విజయ్‌ కెరీర్‌లో ఈ సినిమా ఓ భారీ హిట్‌గా నిలిచింది. సుమారు రూ.5 కోట్ల బడ్జెట్‌తో సిద్ధమైన ఈసినిమా బాక్సాఫీస్‌ వద్ద రూ.50 కోట్ల వసూళ్లు రాబట్టినట్లు సినీ విశ్లేషకులు అంచనా వేశారు.