Vijay Varma: వధువు కావాలంటోన్న విజయ్‌ వర్మ.. తమన్నాను ట్యాగ్‌ చేస్తోన్న నెటిజన్లు

హైదరాబాద్‌: హీరో విజయ్‌ వర్మ (Vijay Varma) గతంలో సినీ ప్రియులకు మాత్రమే తెలిసిన పేరు. కానీ కొన్ని రోజులుగా తరచూ మిల్కీ బ్యూటీ తమన్నా (Tammana)తో కలిసి షికార్లు చేయడంతో బాగా పాపులర్‌ అయ్యారు. తాజాగా ఈ హీరో పెట్టిన ఇన్ స్టా పోస్ట్‌కు నెటిజన్లు తమన్నాను ట్యాగ్‌ చేస్తున్నారు. అంతే కాదు కామెంట్లన్నీ కూడా ఆమె పేరుతో నిండిపోయాయి. ఇంతకి ఈ పోస్ట్‌కు తమన్నాకు ఉన్న సంబంధం ఏంటంటే..

విజయ్ వర్మ నటించిన తాజా వెబ్‌ సిరీస్‌ ‘దహాద్‌’ (Dahaad). సోనాక్షి సిన్హా ప్రధాన పాత్రలో నటించిన ఈ సిరీస్‌ మే 12న విడుదలైంది. అమెజాన్‌ ప్రైమ్‌ వీడియోలో ప్రసారమవుతోంది. ఇక ఈ సిరీస్‌ ప్రచారంలో భాగంగా పేపర్‌లో ప్రకటన ఇచ్చారు. అందులో ఇండియాలోని మోస్ట్ ఎలిజిబుల్‌ బ్యాచిలర్‌కు వధువు కావలెను అని ఉంది. ఈ ఫొటోను విజయ్‌ వర్మ షేర్‌ చేశాడు. ‘ఈ విషయాన్ని మా అమ్మకు అర్థమయ్యేలా ఎలా చెప్పాలి’ అని క్యాప్షన్‌ పెట్టాడు. దీంతో నెటిజన్లంతా ‘తమన్నా ఉందిగా’ అంటూ కామెంట్స్‌ పెడుతున్నారు. మరికొందరేమో తమన్నాను ట్యాగ్‌ చేస్తున్నారు. ఇక ఈ పోస్ట్‌కు సినీతారలు సైతం స్పందిస్తుండడం విశేషం. 

కొన్ని రోజుల నుంచి తమన్నాతో విజయ్‌ వర్మ రిలేషన్‌లో ఉన్నారంటూ వార్తలు వస్తున్నాయి. ఈ ఏడాది గోవాలో జరిగిన న్యూ ఇయర్‌ వేడుకల్లో వీళ్లు కలిసి కనిపించడంతో ఈ వార్తలు మొదలయ్యాయి. ఆ తర్వాత నుంచి వీళ్లిద్దరూ కలిసి ఫంక్షన్లకు హాజరవుతున్నారు. ఇక తాజాగా మరోసారి ఒకే కారులో వెళ్తూ ఫొటోలకు పోజులిచ్చారు. ఫొటోగ్రాఫర్లకు హాయ్‌ చెబుతూ నవ్వుతూ ముందుకు సాగారు.