Vikrant Rona: అసలు కథ ఇప్పుడే మొదలైంది: సుదీప్‌

ఇంటర్నెట్‌డెస్క్‌: ‘ఆ ఊరు ఒక మర్మమైన ఊరు. ఆ ఊరి ప్రజలు ఏదో ఒక భయంకరమైన కథని దాచాలనుకుంటున్నారు. కథను దాచగలరు. కానీ, భయాన్ని దాచలేరు. ఆ కథ మళ్లీ మొదలైంది. ఆ డెవిల్‌ మళ్లీ వచ్చాడు’ అంటూ ఓ సరికొత్త కథతో ప్రేక్షకుల ముందుకు వస్తున్నారు కన్నడ నటుడు సుదీప్‌(sudeep). ఇంతకీ ఆ కథ ఏంటి? ఆ డెవిల్‌ ఎవరు? దాన్ని అడ్డుకున్నది ఎవరు తెలియాలంటే మా సినిమా చూడాల్సిందే అంటున్నారు. ఆయన కీలక పాత్రలో అనూప్‌ భండారీ దర్శకత్వం వహించిన చిత్రం ‘విక్రాంత్‌ రోణ’(Vikrant Rona). గురువారం ఈ చిత్ర ట్రైలర్‌ను కథానాయకుడు రామ్‌చరణ్‌(Ram charan) విడుదల చేసి సుదీప్‌, చిత్ర బృందానికి శుభాకాంక్షలు తెలిపారు. అన్ని కార్యక్రమాలు పూర్తి చేసుకున్న ఈ సినిమా జులై 28న ప్రేక్షకుల ముందుకు రానుంది. 

విజువల్‌ వండర్‌గా ఈ సినిమాను తీర్చిదిద్దినట్లు ట్రైలర్‌ చూస్తే అర్థమవుతోంది. కన్నడ, తెలుగుతో పాటు, పలు భాషల్లో ‘విక్రాంత్‌ రోణ’కు ప్రేక్షకుల ముందుకు తీసుకొస్తున్నారు.  కథ.. కథనాలు చాలా కొత్తగా ఉంటాయని, యాక్షన్‌కు, గ్రాఫిక్స్‌కు ఎంతో ప్రాధాన్యం ఉంటుందని చిత్ర బృందం చెబుతోంది.  3డీలోనూ ఈ సినిమాను విడుదల చేస్తున్నారు. బాలీవుడ్‌ కథానాయిక జాక్వెలిన్‌ ఫెర్నాండెజ్‌(Jacqueline Fernandez) కీలక పాత్రలో కనిపించనుంది. ‘ఈగ’ చిత్రంతో తెలుగు ప్రేక్షకులకు దగ్గరైన నటుడు సుదీప్‌. ఆ తర్వాత ‘బాహుబలి’లో అతిథి పాత్రలో మెరిశారు. చిరంజీవి నటించిన ‘సైరా’లో అవుకు రాజుగా సుదీప్‌ నటన, డైలాగ్‌ డెలివరీ యాటిట్యూట్‌ ప్రధాన ఆకర్షణగా నిలిచాయి. ఇప్పుడు ‘విక్రాంత్‌ రోణ’తో మరోసారి తెలుగు ప్రేక్షకులను పలకరించబోతున్నారు.