Vikrant Rona: ‘విక్రాంత్‌ రోణ’ తెలుగు వెర్షన్‌ ఆ ఓటీటీలో.. ఎప్పుడంటే?

ఇంటర్నెట్‌ డెస్క్‌: కన్నడ నటుడు కిచ్చా సుదీప్‌ (Sudeep) నటించిన పాన్ ఇండియా చిత్రం ‘విక్రాంత్‌ రోణ’ (Vikrant Rona). భారీ బడ్జెట్‌తో తెరకెక్కిన ఈ సినిమా జులైలో థియేటర్లలో విడుదలై మంచి విజయం అందుకున్న సంగతి తెలిసిందే. ఇటీవల, కన్నడ వెర్షన్‌కు సంబంధించిన ఓటీటీ విడుదల తేదీ ఖరారవగా.. తాజాగా తెలుగు వెర్షన్‌ రిలీజ్‌ డేట్‌ ప్రకటన వెలువడింది. ‘జీ  5’ (Zee 5) వేదికగా ఈ నెల 2 నుంచి కన్నడ భాషలో స్ట్రీమింగ్‌ కానున్న ఈ సినిమా తెలుగు వెర్షన్‌ ‘డిస్నీ+ హాట్‌స్టార్‌’ (Disney+ Hotstar)లో ఈ నెల 16 నుంచి అందుబాటులోకి రానుంది. అనూప్‌ భండారి దర్శకత్వం వహించిన ఈ సినిమాలో నిరూప్‌ భండారి, నీతా అశోక్‌, జాక్వెలిన్‌, రవిశంకర్‌ గౌడ తదితరులు నటించి మెప్పించారు.

ఈ సినిమా కథేంటంటే?

కొమ‌ర‌ట్టు అనే ఊరిలో జ‌రిగే కథ ఇది. ఆ ఊరిలోని ఓ పాడుబ‌డ్డ ఇంట్లో ఓ బ్రహ్మరాక్షసుడు ఉంటున్నాడన్నది అక్కడి ప్రజ‌ల న‌మ్మకం. ఆ ఇంటి ఆవరణలో ఉన్న బావిలో ఓరోజు ఆ ఊరి ఇన్‌స్పెక్టర్‌ శవం దొరుకుతుంది. ఆ హత్య కేసు ఛేదించి, నేరస్థులను పట్టుకోవడం కోసం విక్రాంత్‌ రోణ (సుదీప్‌) రంగంలోకి దిగుతాడు. ఈ క్రమంలో ఆ ఊరిలో అప్పటికే ప‌దుల సంఖ్యలో పిల్లలు హ‌త్యకు గురైన‌ట్లు తెలుసుకుంటాడు. మ‌రి వాళ్ల మ‌ర‌ణాల‌కు.. పోలీస్ హ‌త్యకు ఉన్న సంబంధమేమిటి? ఈ కేసుకు విక్రాంత్ వ్యక్తిగ‌త జీవితానికి ఉన్న లింకేంటి? అస‌లు ఆ ఊరిలో ఉన్న ఆ బ్రహ్మరాక్షసుడు ఎవ‌రు? అనే ఆసక్తికర అంశాలతో ఈ సినిమా తెరకెక్కింది.