Virataparvam: విడుదల పర్వం

విడుదల ఎప్పుడెప్పుడా? అంటూ చాలా రోజులుగా  ఊరిస్తున్న చిత్రం ‘విరాటపర్వం’. ఎట్టకేలకి జులై 1న   ప్రేక్షకుల ముందుకు రానుంది. ఆ విషయాన్ని చిత్రబృందం శుక్రవారం అధికారికంగా ప్రకటించింది. రానా దగ్గుబాటి, సాయిపల్లవి జంటగా నటించిన చిత్రమిది. వేణు ఊడుగుల దర్శకత్వం వహిస్తున్నారు. సుధాకర్‌ చెరుకూరి నిర్మాత. డి.సురేష్‌బాబు  సమర్పకులు. విడుదల తేదీ ఖరారైన సందర్భంగా త్వరలోనే ప్రచార కార్యక్రమాల్ని మొదలు పెట్టనున్నట్టు వెల్లడించాయి సినీ వర్గాలు. 1990లో జరిగిన కొన్ని యథార్థ సంఘటనల ప్రేరణతో తెరకెక్కిన చిత్రమిది. కామ్రేడ్‌ రవన్న పాత్రలో రానా దగ్గుబాటి కనిపిస్తారు. వెన్నెల అనే యువతిగా సాయిపల్లవి నటించారు. యుద్ధం నేపథ్యంలో సాగే ఓ అద్భుతమైన ప్రేమకథగా దర్శకుడు వేణు ఊడుగుల ఈ చిత్రాన్ని మలిచారని, ప్రతీ పాత్ర ప్రేక్షకుల మనసుల్లో నిలిచిపోయేలా ఉంటుందని సినీ వర్గాలు వెల్లడించాయి. ప్రియమణి, నందితాదాస్‌, నవీన్‌ చంద్ర, జరీనా వహాబ్‌, ఈశ్వరీరావ్‌, సాయిచంద్‌ తదితరులు కీలక పాత్రలు పోషించిన ఈ చిత్రానికి సంగీతం: సురేష్‌ బొబ్బిలి, ఛాయాగ్రహణం: డానీ సాంచెజ్‌ లోపెజ్‌, దివాకర్‌ మణి, కూర్పు: శ్రీకర్‌  ప్రసాద్‌, ప్రొడక్షన్‌ డిజైన్‌: శ్రీనాగేంద్ర.