Virupaksha: రూ.62 కోట్ల వసూళ్లతో దూసుకెళ్తూ.. ఆ మూడు భాషల్లో విడుదలకు సిద్ధమై..

ఇంటర్నెట్‌ డెస్క్‌: విభిన్న కథలకు ప్రేక్షకుల ఆదరణ ఎప్పుడూ ఉంటుందని ‘విరూపాక్ష’ (Virupaksha) సినిమాతో మరోసారి రుజువైంది. సాయిధరమ్‌ తేజ్‌ (Sai Dharam Tej) హీరోగా తెరకెక్కిన ఈ సినిమా తెలుగులో ఏప్రిల్‌ 21 విడుదలై హిట్‌టాక్‌ సొంతం చేసుకున్న సంగతి తెలిసిందే. ఏడు రోజుల్లో రూ.62.5 కోట్లు వసూళ్లు చేసిన ఈ చిత్రం దిగ్విజయంగా రెండో వారంలోకి అడుగుపెట్టింది. మరోవైపు, హిందీ, తమిళ్‌, మలయాళంలో విడుదలకు సిద్ధమైంది. ‘‘తెలుగులో బ్లాక్‌ బస్టర్‌ విజయం అందుకున్న విరూపాక్ష ఇతర భాషల్లోనూ సందడి చేయబోతోంది’’ అంటూ చిత్ర బృందం సోషల్‌ మీడియా వేదికగా ఆనందం వ్యక్తం చేసింది. హిందీలో గోల్డ్‌మైన్స్‌, తమిళ్‌లో స్టూడియో గ్రీన్‌, మలయాళంలో E4 ఎంటర్‌టైన్‌మెంట్‌ సంస్థలు తమ చిత్రాన్ని విడుదల చేస్తున్నట్టు తెలిపింది. రిలీజ్‌ డేట్‌ ఇంకా ప్రకటించలేదు. ‘విరూపాక్ష’ను పాన్‌ ఇండియా స్థాయిలోనే విడుదల చేయాలని ముందుగా భావించినా.. డబ్బింగ్‌ తదితర కార్యక్రమాలకు సమయంలేకపోవడంతో తెలుగులోనే విడుదలైంది.  

రుద్రవనం గ్రామం ఇతివృత్తంతో పీరియాడికల్‌ థ్రిల్లర్‌గా దర్శకుడు కార్తిక్‌ దండు ఈ చిత్రాన్ని తెరకెక్కించారు. రుద్రవనం ప్రజల చావుల వెనకున్న రహస్యాల్ని ఛేదించే సూర్య పాత్రలో సాయిధరమ్‌ తేజ్‌ నటించారు. అతడి ప్రేయసిగా కథానాయిక సంయుక్త కనిపించి, ప్రేక్షకులను ఆకట్టుకుంది.