‘ఎనిమీ’.. ఓ పని పూర్తయింది

ఇంటర్నెట్‌ డెస్క్‌: విశాల్‌, ఆర్య ప్రధాన పాత్రల్లో తెరకెక్కుతోన్న చిత్రం ‘ఎనిమీ’. ఆనంద్‌ శంకర్‌ దర్శకుడు. ఈ సినిమా చిత్రీకరణ పూర్తయిందని సామాజిక మాధ్యమాల వేదికగా ప్రకటించింది చిత్ర బృందం. సెట్‌లో దిగిన ఫొటోని అభిమానులతో పంచుకుంటూ ‘ఎనిమీ షూటింగ్ పూర్తయింది. టీజర్‌ త్వరలోనే వస్తుంది’ అని తెలిపాడు నటుడు విశాల్‌. ‘వాడు-వీడు’ తర్వాత ఆర్య-విశాల్‌ కాంబినేషన్‌లో వస్తోన్న చిత్రమిది. యాక్షన్‌ థ్రిల్లర్‌ నేపథ్యంలో సాగే ఈ సినిమాని మినీ స్టూడియోస్‌ పతాకంపై వినోద్‌ కుమార్‌ నిర్మిస్తున్నారు. మృణాళిని రవి, మమతా మోహన్‌ దాస్‌ నాయికలు. ప్రకాశ్‌ కీలక పాత్ర పోషించారు. తమన్‌ సంగీతం అందిస్తున్నారు. ఈ చిత్రంతోపాటు శరవణన్‌ దర్శకత్వంలో ఓ సినిమా చేస్తున్నాడు విశాల్‌. ‘విశాల్‌ 31’ వర్కింగ్‌ టైటిల్‌తో రూపొందుతోంది. ఆర్య నటించిన ‘సార్‌పట్ట’ చిత్రం జులై 22 నుంచి అమెజాన్‌ ప్రైమ్‌ వేదికగా స్ట్రీమింగ్‌ కానుంది.