The Vaccine War: కశ్మీర్ ఫైల్స్ డైరెక్టర్ మరో సంచలన చిత్రం.. ‘ది వ్యాక్సిన్ వార్’

ఇంటర్నెట్ డెస్క్: కశ్మీర్ ఫైల్స్ చిత్రంతో దేశవ్యాప్తంగా సంచలనం సృష్టించిన దర్శకుడు వివేక్ అగ్నిహోత్రి. తక్కువ బడ్జెట్‌తో నిర్మించిన ఆ చిత్రం బాక్సాఫీస్ వద్ద భారీ విజయాన్ని అందుకుంది. ఓ ఆసక్తికర ప్రాజెక్టుతో ప్రేక్షకుల ముందుకు రానున్నట్టు ఇటీవల ప్రకటించిన సంగతి తెలిసిందే. ఆయన దర్శకత్వంలో పట్టాలెక్కుతున్న మరో సంచలన చిత్రం ‘ది వ్యాక్సిన్ వార్’. కరోనా మహమ్మారి, లాక్‌డౌన్, ప్రజలు పడిన ఇబ్బందులు, వ్యాక్సిన్ కోసం పడిగాపులు ఇలా ప్రతి అంశాన్ని ఈ చిత్రంలో చూపించనున్నారు.

అంతే కాదు, భారతీయ సినిమా చరిత్రలో తొలిసారి 11 భాషల్లో దీనిని విడుదల చేయనున్నారు. వచ్చే ఏడాది స్వాతంత్ర్య దినోత్సవం సందర్భంగా ఆగస్టు 15న ప్రేక్షకుల ముందుకు రానుంది. ఐ యామ్ బుద్ధ ప్రొడక్షన్ పతాకం పై పల్లవి జోషి ‘ది వ్యాక్సిన్ వార్’ నిర్మిస్తున్నారు. కశ్మీర్ ఫైల్స్ తీసిన అభిషేక్ అగర్వాల్ ఆర్ట్స్ పతాకంపై ఈ సినిమాను దేశవ్యాప్తంగా విడుదల చేయనున్నారు. నటీనటులు, ఇతర సాంకేతిక నిపుణుల వివరాలు త్వరలోనే వెల్లడించనున్నారు.