అనుష్క ఫోన్‌ నంబర్‌ అనుకుని షర్ట్‌ లేకుండా ఫొటోలు పంపారు: దర్శకుడు

హైదరాబాద్‌: ‘మెంటల్‌ మదిలో’, ‘బ్రోచేవారెవరురా’, ‘అంటే.. సుందరానికీ’.. ఇలా విభిన్నమైన కథలతో ప్రేక్షకులను అలరించిన దర్శకుడు వివేక్‌ ఆత్రేయ (Vivek Athreya). తాజాగా ఓ ఇంటర్వ్యూలో పాల్గొన్న ఆయన.. ఇప్పుడున్న రోజుల్లో సోషల్‌మీడియా(Social Media)లో నెగెటివిటీ ఎక్కువైందన్నారు. కొంతమంది నెటిజన్లు కావాలనే విమర్శలు చేస్తున్నారని చెప్పారు. సెలబ్రిటీలందరూ సోషల్‌మీడియాకు దూరంగా ఉంటే ఇలాంటివి తగ్గుతాయని తెలిపారు. కొవిడ్‌ సమయంలో చోటుచేసుకున్న ఓ సంఘటనను ఈ సందర్భంగా పంచుకున్నారు.

‘‘కొవిడ్‌ సమయంలో నా స్నేహితుడి తండ్రి అనారోగ్యానికి గురయ్యారు. ఆయనకు రక్తం అవసరమైంది. ఆయన బ్లడ్‌ గ్రూప్‌నకు సరిపడే రక్తదాత కోసం మేం ఎంతగానో వెతికాం. నా ఫోన్‌ నంబర్‌ని జత చేస్తూ అందరికీ సందేశాలూ పంపాను. ఈ విషయం తెలుసుకున్న నటి అనుష్క (Anushka).. మాకు సాయం చేయడం కోసం నేను పంపిన సందేశాన్ని తన సోషల్‌మీడియా ఖాతాలో షేర్‌ చేసింది. ఆ పోస్ట్‌లో ఉన్న ఫోన్‌ నంబర్‌ ఆమెదే అనుకుని.. చాలామంది కాల్స్‌ చేశారు. ఆ పోస్ట్‌ పెట్టిన తర్వాత నా ఫోన్‌కు వచ్చిన కాల్స్‌ ఎవరూ ఊహించి ఉండరు. ఒకరు వీడియో కాల్‌ చేస్తే.. మరొకరు షర్ట్‌ లేకుండా ఫొటోలు పంపారు.. బాబోయ్‌.. ఆ దారుణాలను చెప్పలేను. నటీమణుల జీవితం ఇంత కష్టంగా ఉంటుందా.. అని ఆరోజు నేను షాక్‌ అయ్యాను. కొంత కాలానికే ఆ ఫోన్‌ నంబర్‌ బ్లాక్‌ చేసేశాను’’ అని వివేక్‌ వివరించారు.

అనంతరం ఆయన ‘అంటే.. సుందరానికీ’ (Ante Sundaraniki) చిత్రానికి వచ్చిన మిశ్రమ స్పందనలపై స్పందించారు. ‘‘అంటే సుందరానికీ’ చిత్రానికి వచ్చిన ఫలితానికి పూర్తి బాధ్యత నాదే. ఆ సినిమా చూసి కొంతమంది నచ్చిందన్నారు. మరికొంతమంది సినిమా ఎక్కువ నిడివి ఉందని కామెంట్స్‌ చేశారు. సినిమా సిద్ధం చేసిన తర్వాతే నిడివి పది నిమిషాలు ఎక్కువైందని మాక్కూడా తెలిసింది. దాన్ని ఎడిట్‌ చేయడానికి వీల్లేకుండా పోయింది. ఎందుకంటే ఆ సినిమాలో ఒక సీన్‌కు మరో సీన్‌కు లింక్‌ ఉంటుంది. దేన్ని తొలగించినా అర్థం లేకుండా పోతుంది. అందుకే మేము సినిమా నిడివిని తగ్గించలేకపోయాం. అయితే, సినిమాకు ఎక్కువగా దగ్గర కాకూడదని ఈ సినిమా నుంచే నేర్చుకున్నా. ఎందుకంటే ఈ సినిమా ఫలితం నన్ను ఎంతో బాధపెట్టింది’’ అని ఆయన వివరించారు.