KGF 2: కేజీఎఫ్‌-2.. ప్రమాదం ముందుంది..!

రిలీజ్‌ డేట్‌ని ఫిక్స్‌ చేసిన చిత్రబృందం

బెంగళూరు: కన్నడ స్టార్‌ యశ్‌ని (Yash) కోట్లాదిమంది సినీ ప్రియులకు దగ్గర చేసిన చిత్రం ‘కేజీఎఫ్‌’ (KGF). చిత్రీకరణ పూర్తి చేసుకున్న ఈ సినిమా పార్ట్ 2 గతేడాదిలోనే ప్రేక్షకుల ముందుకు రావాల్సి ఉండగా కరోనా కారణంగా అనేక పర్యాయాలు వాయిదా పడింది. ఈ క్రమంలోనే వేసవి కానుకగా ఈఏడాది ఏప్రిల్‌ 14న ‘కేజీఎఫ్‌-2’ (KGF 2)ని ప్రేక్షకుల ముందుకు తీసుకురానున్నట్లు చిత్రబృందం గతేడాది ప్రకటించింది. ఈ నేపథ్యంలో శనివారం యశ్‌ పుట్టినరోజుని పురస్కరించుకుని చిత్రబృందం స్పెషల్‌ సర్‌ప్రైజ్‌ ఇచ్చింది. ‘కేజీఎఫ్‌-2’ (KGF 2) సరికొత్త పోస్టర్‌ విడుదల చేసింది. ‘‘గమనిక: ప్రమాదం ముందుంది’’ అని పేర్కొంటూ షేర్‌ చేసిన ఈ పోస్టర్‌లో ఏప్రిల్‌ 14నే చిత్రాన్ని విడుదల చేస్తామని మరోసారి అధికారికంగా ప్రకటించింది. విడుదల తేదీలో ఎలాంటి మార్పులు లేకపోవడంతో సినీ ప్రియులు ఆనందం వ్యక్తం చేస్తున్నారు.

‘కేజీఎఫ్‌’కు ప్రీక్వెల్‌గా ఈ సినిమా సిద్ధమైంది. ఈ చిత్రానికి ప్రశాంత్‌నీల్‌ (Prasanth Neel) దర్శకత్వం వహించారు. బాలీవుడ్‌ నటుడు సంజయ్‌ దత్‌ (Sanjay Dutt) ఈ చిత్రంలో ప్రతినాయకుడిగా కనిపించనున్నారు. ‘అధీరా’ పాత్రలో ఆయన ప్రేక్షకుల్ని అలరించనున్నారు. యాక్షన్‌ ఎంటర్‌టైనర్‌గా తెరకెక్కిన ఈ చిత్రంలో బాలీవుడ్‌ నటి రవీనా టాండన్‌, టాలీవుడ్‌ నటుడు రావు రమేష్‌, ప్రకాశ్‌రాజ్‌ కీలకపాత్రలు పోషించారు.