KGF 2: ముందుంది ప్రమాదం

యష్‌ కథానాయకుడిగా ప్రశాంత్‌ నీల్‌ దర్శకత్వంలో రూపొందిన యాక్షన్‌ చిత్రం ‘కేజీఎఫ్‌ చాప్టర్‌2’. విజయ్‌ కిరగందుర్‌ నిర్మించారు. శ్రీనిధి శెట్టి కథా నాయిక. సంజయ్‌ దత్‌, రవీనా టాండన్‌, రావు రమేష్‌ తదితరులు కీలక పాత్రలు పోషించారు. శనివారం యష్‌ పుట్టినరోజు. ఈ సందర్భంగా సినిమా నుంచి కొత్త లుక్‌ విడుదల చేశారు. ఆ ప్రచార చిత్రంలో యష్‌.. రాఖీభాయ్‌గా సీరియస్‌ లుక్‌తో ఆకట్టుకునేలా కనిపించారు. ‘‘హెచ్చరిక.. ముందు ప్రమాదముంది’’ అంటూ  పోస్టర్‌పై ఓ వ్యాఖ్యను జోడించారు. ఈ లుక్‌ ద్వారా సినిమాని ఏప్రిల్‌ 14నే విడుదల చేయనున్నట్లు మరోసారి అధికారికంగా ప్రకటించారు. ‘కేజీఎఫ్‌’కు సీక్వెల్‌గా రూపొందిన చిత్రమిది. సంజయ్‌ దత్‌ ఈ సినిమాలో అధీరా అనే శక్తిమంతమైన ప్రతినాయకుడిగా కనిపించనున్నారు. ఈ చిత్రానికి సంగీతం: రవి బస్రూర్‌, ఛాయాగ్రహణం: భువన్‌ గౌడ.