Published : 26 May 2021 16:43 IST

Lottery: రూ.7కోట్లు ఇచ్చేశారు.. మనసులు గెలిచారు

చెత్తకుండీకి చేరిన లాటరీ టికెట్‌ దశ తిప్పింది
భారతీయ కుటుంబం నిజాయితీకి ప్రశంసలు

న్యూయార్క్‌: అమెరికాలోని మాసాచుసెట్స్‌ రాష్ట్రంలో నివాసం ఉంటున్న ఓ మహిళ లాటరీ తగల్లేదని పరధ్యానంగా దుకాణంలోని చెత్తకుండీలో పడేసిన టికెట్‌ మిలియన్‌ డాలర్లు (రూ.7.27 కోట్లు) గెలుచుకుంది. ఆ దుకాణం నిర్వహిస్తున్న ఓ భారతీయ కుటుంబం ఈ విషయం గమనించి దీర్ఘకాలంగా తమ వినియోగదారుగా ఉన్న ఆమెకు టికెట్‌ను తిరిగి అప్పగించి అందరి మనసులు గెలుచుకొంది.

మాసాచుసెట్స్‌ రాష్ట్రంలోని సౌత్‌విక్‌ పట్టణంలో ఓ భారతీయ కుటుంబం ‘లక్కీ స్టాప్‌’ పేరిట దుకాణం నిర్వహిస్తోంది. ఈ దుకాణానికి తరచూ వచ్చే లీ రోజ్‌ ఫిగా అనే స్థానిక మహిళ గత మార్చిలో వారి వద్ద డైమండ్‌ మిలియన్స్‌ స్క్రాచ్‌-ఆఫ్‌ లాటరీ టికెట్‌ కొంది. లాటరీ ఫలితాన్ని చూసుకునేందుకు ఇటీవల దుకాణానికి వచ్చిన లీ రోజ్‌ ఫిగా పరధ్యానంలో టికెట్‌ గీకి (స్క్రాచ్‌-ఆఫ్‌) చూసింది. ‘మధ్యాహ్న భోజన విరామంలో దుకాణానికి వెళ్లా. సమయం తక్కువగా ఉంది. ఆ ధ్యాసలో టికెట్‌ను పైపైన గీకి చూసి లాటరీ తగల్లేదులే అంటూ అక్కడే పడేసి వచ్చేశా’ అని ఆమె తెలిపింది.

అక్కడే చెత్తలో పది రోజులపాటు పడున్న ఆ టికెట్‌ దుకాణ యజమాని కుమారుడు అభి షా కంటపడింది. టికెట్‌ చూస్తే పూర్తిగా గీకలేదు. ఆ ప్రయత్నం పూర్తి చేసిన అభి అవాక్కయ్యాడు. మిలియన్‌ అమెరికన్‌ డాలర్లు ఆ టికెట్‌ గెలుచుకుంది. తన తల్లి అరుణా షా విక్రయించిన ఆ టికెట్‌ చేత పట్టుకొన్న అభి ‘నేను మిలియనీర్‌’ అంటూ కాసేపు కలల్లో తేలిపోయాడు. ఖరీదైన టెస్లా కారు కొందామని అనుకున్నాడు. ‘రెండు రాత్రులు మా కుటుంబానికి నిద్ర లేదు’ అని దుకాణ యజమాని మౌనిశ్‌ షా తెలిపారు. ఇండియాలో ఉంటున్న తాతయ్య, నానమ్మలకు అభి ఫోను చేసి విషయం చెప్పాడు. ‘ఆ డబ్బు మనకు అక్కర్లేదు. టికెట్‌ ఎవరు కొన్నారో వాళ్లకు  ఇచ్చేయండి’ అని వాళ్లు నిష్కర్షగా చెప్పారు. మారు మాట్లాడకుండా ఆ టికెట్‌ను విజేతకు అప్పగించాలని మౌనిశ్‌ షా కుటుంబం నిర్ణయించుకుంది. ఈ విషయం లీ రోజ్‌ ఫిగాకు చెప్పగానే.. ఆమె కాసేపు నమ్మలేదు. తర్వాత షా కుటుంబాన్ని పట్టుకొని గట్టిగా ఏడ్చేసింది. ఇపుడు అభి కుటుంబాన్ని ప్రశంసిస్తూ ప్రతిరోజూ ఫోన్‌కాల్స్‌ వస్తున్నాయి. మీడియా ప్రతినిధులు ఇంటర్వ్యూలు అడుగుతున్నారు. ‘ఆ టికెట్‌ మా దగ్గరే ఉంచుకొని ఉంటే.. ఈ ఆనందం ఉండేది కాదు’ అని అభి అంటున్నాడు.   

Read latest Nri News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని