Updated : 06 Feb 2021 06:01 IST

ప్రస్తుతానికి లాటరీ విధానమే

హెచ్‌-1బి వీసాల జారీపై బైడెన్‌ సర్కారు నిర్ణయం
ట్రంప్‌ తెచ్చిన నూతన విధానం అమలు
డిసెంబరు 31 వరకు వాయిదా

వాషింగ్టన్‌: హెచ్‌-1బి వీసాల జారీ ప్రక్రియకు సంబంధించి అమెరికాలో బైడెన్‌ సర్కారు తాజాగా కీలక నిర్ణయం తీసుకుంది. వేతనాలు, ప్రతిభ ఆధారంగా వాటిని జారీ చేసేందుకు వీలుగా ట్రంప్‌ హయాంలో తీసుకొచ్చిన నూతన విధానం అమలును తాత్కాలికంగా వాయిదా వేసింది. ఈ ఏడాది డిసెంబరు 31 వరకు పాత లాటరీ విధానంలోనే ఆ ప్రక్రియను పూర్తి చేయనున్నట్లు ప్రకటించింది. ‘హెచ్‌-1బి’ అనేది వలసేతర వీసా. అమెరికా పౌరసత్వం, వలస సేవల సంస్థ (యూఎస్‌సీఐఎస్‌) ఏటా ఈ వీసాలను గరిష్ఠంగా 65 వేల వరకు జారీ చేస్తుంటుంది. ఆ దేశంలోని విశ్వవిద్యాలయాల్లో సైన్స్‌, టెక్నాలజీ, ఇంజినీరింగ్‌, గణితం (స్టెమ్‌) విభాగాల్లో ఉన్నత విద్య పూర్తిచేసిన వారికి అదనంగా మరో 20 వేల వరకూ వీసాలను జారీ చేసే అధికారమూ దానికి ఉంది. అయితే- కంపెనీలు అమెరికన్లకు ఉద్యోగాలివ్వకుండా, తక్కువ వేతనాలకే విదేశీయులను ఉద్యోగాల్లో నియమించుకుంటూ ‘హెచ్‌-1బి’ విధానాన్ని దుర్వినియోగం చేస్తున్నాయని విమర్శలున్నాయి. ఈ నేపథ్యంలో వేతనాలు అధిక నైపుణ్యాలు, అత్యధిక వేతనాలు ఉన్న విదేశీయులకే ఆ వీసాలను జారీ చేయాలని ట్రంప్‌ ప్రభుత్వం గతంలో నిర్ణయం తీసుకుంది. సంప్రదాయ కంప్యూటరైజ్డ్‌ లాటరీ విధానాన్ని రద్దు చేస్తూ ఈ ఏడాది జనవరి 7న యూఎస్‌సీఐఎస్‌ ఓ ప్రకటన విడుదల చేసింది కూడా. మార్చి 9 నుంచి నూతన విధానం అమల్లోకి రావాల్సి ఉంది. అయితే- కొత్త విధానానికి సంబంధించిన నిబంధనల రూపకల్పనకు, వాటిని పరీక్షించేందుకు, సిబ్బందికి శిక్షణ ఇచ్చేందుకు మరికొంత సమయం అవసరమని ప్రస్తుత అధ్యక్షుడు బైడెన్‌ నేతృత్వంలోని సర్కారు అభిప్రాయపడింది. దీంతో ఈ ఏడాది చివరి వరకూ పాత లాటరీ విధానాన్నే కొనసాగించనున్నట్లు యూఎస్‌సీఐఎస్‌ ప్రకటించింది.

Read latest Nri News and Telugu News

 Follow us on Facebook, Twitter, Instagram, Koo, ShareChat and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

జిల్లా వార్తలు

సినిమా

మరిన్ని

బిజినెస్

మరిన్ని

క్రీడలు

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జాతీయం

మరిన్ని