USA: బహుళ జాతుల దేశంగా అమెరికా.. తగ్గుతున్న తెల్లవారి జనాభా

ఆసియన్, హిస్పానిక్‌ల సంఖ్య పెరుగుదల

వాషింగ్టన్‌: అమెరికా క్రమేణా బహుళ జాతుల సమ్మిళిత దేశంగా రూపుదిద్దుకుంటోంది. గత దశాబ్దంగా శ్వేత జాతీయుల ఆధిక్యం తగ్గుతుండడంతో పాటు, ఇతర జాతీయుల సంఖ్య కూడా పెరుగుతోంది. గురువారం సెన్సస్‌ బ్యూరో విడుదల చేసిన జనాభా లెక్కల్లో ఈ విషయం వెల్లడయింది. 1790 నుంచి ఇక్కడ జనాభా లెక్కలను సేకరిస్తున్నారు.
* తొలిసారిగా శ్వేత జాతీయుల సంఖ్య తగ్గింది. 2010లో వారి జనాభా 19.6 కోట్లు ఉండగా, తాజాగా 19.10 కోట్లు ఉంది. శాతాలవారీగా చూస్తే 63.7% నుంచి 57.8%కు తగ్గింది. అయితే మొత్తం జనాభాలో వారిదే ఆధిక్యం
* చాలా మంది తాము ఏదో ఒక జాతివారమని చెప్పుకోవడానికి ఇష్టపడడం లేదు. తాము బహుళ జాతీయులమని భావిస్తున్నారు. అలాంటి వారి సంఖ్య 4.99 కోట్ల వరకు ఉంది.  
* గత పదేళ్లలో పల్లెల్లో జనాభా తగ్గింది. మెట్రోపాలిటన్‌ నగరాల్లో విపరీతంగా పెరిగింది.  
* దేశంలో పిల్లల సంఖ్య బాగా తగ్గుతోంది. జనాభా వృద్ధి రేటు తగ్గడమే ఇందుకు కారణం. 18 ఏళ్ల కన్నా తక్కువ ఉన్న పిల్లల సంఖ్య 2010లో 7.42 కోట్లు ఉండగా, ఇప్పుడు 7.31 కోట్లు ఉంది. 1.4%మేర తగ్గుదల కనిపిస్తోంది. దేశ జనాభాలో 22% మంది పిల్లలే.
* 18 ఏళ్లు దాటిన వయోజనుల జనాభా 23.7 కోట్ల నుంచి 26.1 కోట్లకు పెరిగింది. శాతాల వారీగా చూస్తే 76% నుంచి 78%కి చేరింది. 
* ఆసియన్లు, స్పానిష్‌-మెక్సికో మూలాలు ఉన్న హిస్పానిక్‌ జాతుల సంఖ్య గణనీయంగా పెరిగింది. దేశ జనాభాలో 18.7% మంది హిస్పానిక్‌లే. మొత్తం 6.21 కోట్ల మంది ఉన్నారు. ఆసియన్ల సంఖ్య దశాబ్దం కాలంలో మూడొంతులు పెరిగింది. మొత్తం 2.4 కోట్ల మంది ఉన్నారు. 
* అమెరికా మొత్తం జనాభా 33.14 కోట్లుగా నమోదయింది.