గల్ఫ్‌ యానానికి రాచబాటలివిగో..

పొట్ట చేత పట్టుకొని ఉపాధి మీద ఆశతో ఎడారి దేశాలకు వెళ్తున్న వలస కార్మికులను నకిలీ ఏజెంట్లు అనేక రకాలుగా మోసగిస్తున్నారు. వర్క్‌ పర్మిట్‌ వీసాలకు బదులు పర్యాటక వీసాలను

Updated : 10 Dec 2021 15:15 IST

ఎడారి దేశాల్లో ఉపాధి కోసం వెళ్లేవారికి అధికారిక సహకారం

ప్రభుత్వ ఆధ్వర్యంలోనే పక్కా ఏర్పాట్లు

పొట్ట చేత పట్టుకొని ఉపాధి మీద ఆశతో ఎడారి దేశాలకు వెళ్తున్న వలస కార్మికులను నకిలీ ఏజెంట్లు అనేక రకాలుగా మోసగిస్తున్నారు. వర్క్‌ పర్మిట్‌ వీసాలకు బదులు పర్యాటక వీసాలను అంటగడుతూ పరాయి గడ్డపై కష్టాలపాలు చేస్తున్నారు. శంషాబాద్‌ విమానాశ్రయంలో 44 మంది మహిళలు ఇలాగే వెళ్తూ ఇమ్మిగ్రేషన్‌ అధికారులకు దొరికిపోయారు. తరచూ ఇలాంటి ఉదంతాలు వెలుగుచూస్తూనే ఉన్నాయి. గల్ఫ్‌ దేశాలకు తెలుగు రాష్ట్రాల నుంచి వేలాది మంది కార్మికులు వలస వెళ్తున్న నేపథ్యంలో బోగస్‌ ఏజెంట్ల మోసాలు ఎలా జరుగుతుంటాయి.. గల్ఫ్‌ దేశాల్లో ఉపాధి పొందేందుకు సురక్షిత మార్గాలేంటి.. వంటి అంశాలపై ‘ఈనాడు’ ప్రత్యేక కథనమిది..

సాధారణంగా గల్ఫ్‌లో విదేశీ కార్మికులకు పనిలో పెట్టుకోవాలనుకున్న సంస్థ అందుకు అక్కడి ప్రభుత్వం నుంచి అనుమతి పొంది వర్క్‌ పర్మిట్‌ (ఉపాధి) వీసా పంపించాలి. ఇందుకోసం ఆ సంస్థ కార్మికుడి పేరిట 750 దిర్హామ్‌లు/రూ. 1.5 లక్షలను డిపాజిట్‌ చేయాలి. నకిలీ ఏజెంట్లు కార్మికులను ఉపాధి వీసాపై కాకుండా పర్యాటక వీసాపై పంపి మోసగిస్తున్నారు. ఈ మతలబు తెలియని అమాయకులు అక్కడికి వెళ్లి చిక్కుల్లో పడుతున్నారు. కొంతమంది స్థానిక పోలీసులకు చిక్కి జైలు పాలవుతున్నారు. తరచూ అక్కడి ప్రభుత్వాలు వర్క్‌ పర్మిట్‌ వీసా లేని వారిని గుర్తించి తిరిగి స్వదేశాలకు పంపేస్తున్నాయి. 2019లో ఇలా 250 మందిని భారత్‌కు పంపించాయి. అధీకృత ఏజెంటు ద్వారా వీసా పొందేందుకు రూ. 34,500 లోపే వ్యయం అవుతున్నా.. అది తెలియక చాలామంది అమాయకులు నకిలీ ఏజెంట్లకు రూ. లక్షన్నర వరకు ముట్టజెప్పి మరీ అవస్థల పాలవుతున్నారు.


పీఓఐ అనుమతి ఉంటేనే రక్షణ

అధీకృత ఏజెంట్ల నుంచే వీసా పొందాల్సి ఉన్నా చాలామంది అవగాహనలోపంతో నకిలీల వలలో చిక్కుతుంటారు. ఇలాంటి మోసాలకు విరుగుడుగా కేంద్ర ప్రభుత్వం ప్రత్యేక యంత్రాంగాన్ని ఏర్పాటు చేసింది. విదేశీ వలస కార్మికుల సంరక్షణ కార్యాలయం (ప్రొటెక్టర్‌ ఆఫ్‌ ఇమ్మిగ్రెంట్‌ -పీఓఐ) దీని పరిధిలోనే ఉంటుంది. తెలుగు రాష్ట్రాలకు సంబంధించి హైదరాబాద్‌లోని ప్రాంతీయ పాస్‌పోర్టు కార్యాలయ ఆవరణలో ఇది ఉంది. ముఖ్యంగా గల్ఫ్‌ వెళ్లే వారిలో పదో తరగతి ఉత్తీర్ణతైనా లేనివారికి ఈ కార్యాలయం ఎంతో సహాయపడుతుంది. ముందుగా కార్మికులు ఈ కార్యాలయానికి వచ్చి ఇమిగ్రేషన్‌ చెక్‌ రిక్వైర్డ్‌ (ఈసీఆర్‌) క్లియరెన్స్‌ పొందాలి. ఆ సమయంలో సదరు కార్మికుడు ఎక్కడికి వెళ్తున్నారు? అక్కడి కంపెనీలో పని చేసేందుకు సరైన వీసా ఉందా? ఆ సంస్థ సరైనదేనా? వంటి పూర్తి వివరాల్ని ఇక్కడే తనిఖీ చేస్తారు. ఇక్కడే అన్నీ సరిచూసుకుని అధికారికంగా వెళ్తే అక్కడ ఏవైనా ఇబ్బందులు ఎదురైనా సులభంగా అధిగమించే వీలుంటుంది. అక్కడి భారత ఎంబసీ సహకారం లభిస్తుంది. అలాగే నామమాత్రపు రుసుంతో రూ. 10 లక్షల వరకు ప్రమాద బీమా, వైద్యచికిత్స బీమా, పింఛను సదుపాయం పొందే అవకాశాలు కలుగుతాయి.



తెలుగు రాష్ట్రాల్లో అధీకృత సంస్థలివే..

గల్ఫ్‌ దేశాలకు వెళ్లే వారికి శిక్షణ, ఉపాధి అవకాశాల సమాచారం కోసం తెలంగాణ, ఏపీ రాష్ట్ర ప్రభుత్వాలు ప్రత్యేక సంస్థలను ఏర్పాటు చేశాయి. వాటి ద్వారా నిర్ణీత రుసుం చెల్లించి వర్క్‌ పర్మిట్‌ వీసాలు పొందే అవకాశముంది. తమను సంప్రదిస్తే వీసా ప్రక్రియను సులభంగా పూర్తి చేయిస్తామని టామ్‌కామ్‌ జీఎం నాగభారతి తెలిపారు.


తెలంగాణ

తెలంగాణ ఓవర్‌సీస్‌ మ్యాన్‌పవర్‌ కంపెనీ లిమిటెడ్‌ (టామ్‌కామ్‌), ఐటీఐ మల్లేపల్లి క్యాంపస్‌, హైదరాబాద్‌,  ఫోన్‌ నం.04023342040

వెబ్‌సైట్‌: ww.tomcom.telangana.gov.in

ఆంధ్రప్రదేశ్‌

ఓవర్‌సీస్‌ మ్యాన్‌పవర్‌ కంపెనీ ఆంధ్రప్రదేశ్‌ (ఓమ్‌క్యాప్‌), సిద్ధార్థ నగర్‌, విజయవాడ.

వెబ్‌సైట్‌: http://www.omc.ap.gov.in


- ఈనాడు, హైదరాబాద్‌


Read latest Nri News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని