ఫిలడెల్ఫియాలో తెదేపా నేత మళ్ల అప్పారావుకు సన్మానం

ఫిలడెల్ఫియా: అమెరికా పర్యటనలో ఉన్న తెదేపా సీనియర్‌ నేత, వైజాగ్ మాజీ కార్పొరేటర్ మళ్ల అప్పారావును మే 2న అమెరికాలోని ఫిలడెల్ఫియాలో ఫిలడెల్ఫియా తెలుగుదేశం అభిమానులు ఘనంగా సత్కరించారు. పార్టీ ఆవిర్భావం నుంచి నిస్వార్థంగా సేవలందిస్తున్న అప్పారావులాంటి నేతలు.. పార్టీకి వెన్నెముకలాంటి వారని, ఎన్టీఆర్‌ స్ఫూర్తితో చంద్రబాబు నాయకత్వంలో పార్టీకి పునర్‌ వైభవం కోసం కృషిచేయాలని ఆకాంక్షించారు. ఈ సందర్భంగా మళ్ల అప్పారావు మాట్లాడుతూ.. ఎన్టీఆర్‌ పిలుపు మేరకు అభిమానిగా రాజకీయాల్లోకి వచ్చానని, ప్రవాసాంధ్రులంతా చంద్రబాబు నాయకత్వంలో రాబోయే ఎన్నికల్లో తెదేపా గెలుపుకోసం కృషిచేయాలని కోరారు. పట్టాలు తప్పిన ప్రగతి చక్రాలను మళ్లీ గాడిలో పెట్టి ఏపీ అభివృద్ధిలో పాలుపంచుకోవాలని విజ్ఞప్తి చేశారు. ఈ కార్యక్రమంలో పొట్లూరి రవి, సునీల్‌ కోగంటి, గోపి వాగ్వాల, సతీష్ తుమ్మల, సాంబయ్య కోటపాటి, కోటి, పవన్ నడింపల్లి, ఫణి కంతేటి, విశ్వనాధ్ కోగంటి మోహన్ మల్ల తదితరులు పాల్గొన్నారు.