సింగపూర్‌లో ‘తెలుగుబడి’ ఉత్సవం

సింగపూర్‌: సింగపూర్‌ తెలుగు సమాజం తెలుగు బాలబాలికలకు గత 12 సంవత్సరాలుగా లాభాపేక్ష లేకుండా, సేవాదృక్పథంతో నిర్వరామంగా తరగతులను నిర్వహిస్తోంది. సిలికానాంధ్ర విశ్వి విద్యాలయం పాఠ్య ప్రణాళికలో సాగే ఈ తరగుతులను కొవిడ్ సమయంలోనూ జూమ్‌ ద్వారా నిర్వహించారు. 2021-22 విద్యా సంవత్సరానికి గత మేనెలలో పరీక్షలు నిర్వహించగా జులై 17న ఫలితాలను ప్రకటించి ప్రశంసాపత్రాలను అందించారు. సుమారు 50 విద్యార్థులు, వారి తల్లిదండ్రులు హాజరయ్యారు. కార్యక్రమానికి స్వాతి కురిచేటి వ్యాఖ్యాతగా వ్యవహరించారు. వివిధ సాంస్కృతిక కార్యక్రమాలు అందరినీ అలరించాయి. 

సింగపూర్‌ తెలుగు సమాజం అధ్యక్షుడు కోటిరెడ్డి మాట్లాడుతూ.. సంస్కృతి సంప్రదాయాలు పదికాలాలు నిలవాలంటే భాషే ప్రధానమన్నారు. మాతృదేశానికి దూరంగా ఉండటంతోపాటు ఆంగ్లమాధ్యమంగా ఉన్న ఈ రోజుల్లో  మన ‘తెలుగు బడి’ పిల్లలు మాత్రమే కుటుంబసభ్యులతో మనస్ఫూర్తిగా తెలుగులో మాట్లాడుతున్నారని చెబుతున్నప్పుడు ఎంతో ఆనందం వేసిందని పేర్కొన్నారు. వచ్చే విద్యా సంవత్సర ప్రణాళికను తెలుగు బడి కార్యనిర్వహణాధికారి, తెలుగు సమాజం కోశాధికారి మల్లికార్జున రావు పాలెపు వివరించారు. ఈ కార్యక్రమంలో తెలుగుబడి ఉపాధ్యాయులు కాయల రాఘవేంద్ర, కొణిజేటి శ్రీలక్ష్మి, దొంతు కిరణ్, ఆలపాటి రాఘవ, కనగాల సౌందర్య, వల్లభజోస్యుల రంగనాధ్, ముల్పూరి ప్రతిమలను సింగపూర్ తెలుగు సమాజం కార్యవర్గం ఘనంగా సన్మానించి కృతజ్ఞతలు తెలియజేసింది.