బాలభారతి పాఠశాలకు కర్నూలు ఎన్నారై ఫౌండేషన్‌ ₹10 లక్షల విరాళం

ఓర్వకల్లు: కర్నూలు జిల్లా ఓర్వకల్లు మండలంలోని పొదుపులక్ష్మీ ఐక్య సంఘం నిర్వహిస్తున్న బాలభారతి పాఠశాలకు కర్నూలు ఎన్.ఆర్.ఐ. ఫౌండేషన్ విరాళం ఇచ్చింది. తానా ఫౌండేషన్ సహకారంతో వరుసగా నాలుగో ఏటా రూ.10లక్షల విరాళాన్ని అందజేసింది. ఈ మొత్తాన్ని తానా ఫౌండేషన్ ఛైర్మన్‌ శశికాంత్ వల్లేపల్లి చెక్కు రూపంలో పాఠశాల వ్యవస్థాపకురాలు విజయభారతికి శుక్రవారం అందజేశారు. అనాథ విద్యార్థుల చదువుకు ఎలాంటి ఆటంకాలు లేకుండా విద్యనందించాలనే లక్ష్యంతో ఈ విరాళాన్ని ఇస్తున్నట్టు తానా బోర్డు సభ్యులు, కర్నూలు ఎన్.ఆర్.ఐ ఫౌండేషన్ ఛైర్మన్ పొట్లూరి రవి తెలిపారు. లాభాపేక్ష లేకుండా గ్రామీణ ప్రాంత విద్యార్థులకు ఉత్తమ విద్యనందిస్తున్న బాలభారతి పాఠశాలకు భవిష్యత్తులోనూ తమవంతు సహకారం అందజేస్తామన్నారు. ఈ గొప్ప కార్యానికి పలువురు ఎన్నారైలు తోడ్పాటు అందిస్తున్నారని.. వారందరికీ ధన్యవాదాలు తెలిపారు. 

ఓర్వకల్లు పొదుపు సంఘం మహిళలు శ్రమశక్తితో నిర్మించుకున్నబాలభారతి పాఠశాల మహిళాశక్తికి నిదర్శనమని, వారందరినీ అభినందిస్తున్నట్లు పాణ్యం ఎమ్మెల్యే కాటసాని రాంభూపాల్ రెడ్డి  తెలిపారు. కర్నూలు ఎన్.ఆర్.ఐ ఫౌండేషన్ స్ఫూర్తితో ఎన్నారైలు సామాజిక సేవా కార్యక్రమాల్లో తమవంతు పాత్ర పోషించాలని ఆకాంక్షించారు. భవిష్యత్తులోనూ బాలభారతి పాఠశాలకు వస్తూ ఉంటానని, తన వంతు సహకారం అందిస్తానని తానా ఫౌండేషన్ ఛైర్మన్ శశికాంత్ వల్లేపల్లి  తెలిపారు. బాలభారతి పాఠశాలను స్ఫూర్తిగా తీసుకుని గ్రామీణ ప్రాంతాల్లో మరిన్ని పాఠశాలలు రావాల్సిన అవసరం ఉందన్నారు. ఈ పాఠశాలకు విచ్చేసిన అతిథులందరికీ తొలుత పాఠశాల వ్యవస్థాపకురాలు విజయభారతి ఆధ్వర్యంలో పొదుపు సంఘం మహిళలు ఘన స్వాగతం పలికారు. అనంతరం విజయభారతి మాట్లాడుతూ.. పాఠశాలకు కర్నూలు ఎన్.ఆర్.ఐ. ఫౌండేషన్ సహకారం మరువలేనిదన్నారు. స్వయంకృషితో ఎదిగి వేల మందికి ఉపాధి కల్పిస్తూ, గ్రామీణ ప్రాంత విద్యార్థులకు విశేషసేవలందిస్తున్న శశికాంత్ వల్లేపల్లి వంటివారు అందరికీ ఆదర్శనీయమని, మరిన్ని విజయశిఖరాలు అధిరోహించాలని ఆకాంక్షించారు. పొట్లూరి రవి ఆధ్వర్యంలో కర్నూలు ఎన్నారై ఫౌండేషన్ అందిస్తున్న సహకారం మరువలేనిదని తెలిపారు.

ఎన్నారైల సహకారంతో జిల్లాకు చెందిన కళాకారులు, మేధావులు, క్రీడాకారులను ప్రోత్సహించడానికి ప్రతిభా పురస్కారాలు అందజేస్తామని ఫౌండేషన్‍ సమన్వయకర్త ముప్పా రాజశేఖర్ తెలిపారు. పొట్లూరి రవి ఆధ్వర్యంలో కర్నూలు ఎన్నారై ఫౌండేషన్ అందిస్తున్న సహకారం మరువలేనిదని బాలభారతి పాఠశాల ప్రధానోపాధ్యాయుడు క్లెమెంట్ సత్యంబాబు, వైస్ ప్రిన్సిపాల్ సవ్య తెలిపారు. ఈ కార్యక్రమంలో శివ నర్సింహా రెడ్డి, మార్కెట్ యార్డ్ ఛైర్మన్ ప్రభాకర్ రెడ్డి, సందడి మధు, తానా సభ్యుడు చందు భసూత్కర, పొదుపులక్ష్మీ ఐక్యసంఘం కమిటీ కార్యవర్గం విజయలక్ష్మి, తాజానిష, పద్మావతమ్మ,  ఐక్యసంఘానికి చెందిన నాలుగువేల మందికి పైగా మహిళలు, బాలభారతి పాఠశాల ఉపాధ్యాయులు, విద్యార్థులు ఈ కార్యక్రమంలో పాల్గొన్నారు.