డార్ట్‌ఫోర్డ్‌ నగరంలో ఉత్సాహంగా హోలీ వేడుకలు

డార్ట్‌ఫోర్డ్‌: యూకేలోని డార్ట్‌ఫోర్డ్‌ నగరంలో హోలీ సంబరాలు ఉత్సాహభరిత వాతావరణంలో జరిగాయి. భారత్‌లో ఎంతో ఘనంగా నిర్వహించుకొనే ఈ రంగుల పండగను ప్రవాసీయులు  బ్రిటన్‌లోనూ ఘనంగా జరుపుకొన్నారు. డార్ట్‌ఫోర్డ్‌ నగరంలో జరిగిన  వేడుకల్లో వెయ్యిందికి పైగా పాల్గొని రంగులు చల్లుకుంటూ సందడి చేశారు. డార్ట్‌ఫోర్డ్‌ బరో కౌన్సిల్‌ ఆధ్వర్యంలో స్థానిక కమ్యూనిటీ సభ్యుల సహకారంతో ఈ వేడుకల్ని ఘనంగా నిర్వహించారు. బ్రిటన్‌ పార్లమెంట్ సభ్యుడు గారెత్‌ జాన్సన్‌, మహేష్‌ చావ్లా (ఛాన్సరీ, ప్రోటోకాల్‌ అధిపతి, హైకమిషనర్‌ ఆఫ్‌ ఇండియా-లండన్‌), కౌన్సిలర్‌ పాల్‌ కట్లర్‌ (డార్ట్‌ఫోర్డ్‌ బరో కౌన్సిల్‌- మేయర్‌), జెరెమీ కౌట్‌ MBE (లీడర్‌, డార్ట్‌ఫోర్డ్‌ బరో  కౌన్సిల్‌),  క్రిస్‌ షిప్పం (కౌన్సిలర్‌-డిప్యూటీ లీడర్‌ డార్ట్‌ఫోర్డ్‌ బరో కౌన్సిల్‌), లెఫ్టినెంట్‌ గుర్విందర్‌ సంధర్‌ MBE, కౌన్సిలర్‌ అవతార్‌ సంధు MBE, కౌన్సిలర్‌ రిచర్డ్‌ వెల్స్‌ (డార్ట్‌ఫోర్డ్‌ బరో కౌన్సిల్‌), కౌన్సిలర్‌ థామస్‌ ఆలివర్‌ తదితర ప్రముఖుల సమక్షంలో జరిగిన ఈ రంగుల పండుగ అంబరాన్ని తాకింది.

ప్రముఖులంతా హోలీ పర్వదిన శుభాకాంక్షలు చెప్పుకొన్నారు. ఒకరిపై ఒకరు రంగులు చల్లుకుంటూ సందడి చేశారు. విశిష్ట అతిథుల సమక్షంలో జరిగిన ఈ ఈవెంట్‌ అందరికీ ఇది ఓ మరపురాని అనుభూతిని కలిగించింది. స్థానిక కమ్యూనిటీ వాలంటీర్లు, డార్ట్‌ఫోర్డ్‌బరో కౌన్సిల్‌ బృందం సంయుక్త ఆధ్వర్యంలో మార్చి 5న (హోలీకి మూడు రోజుల ముందుగానే) డార్ట్‌ఫోర్డ్‌ సెంట్రల్‌ పార్కులో నిర్వహించిన ఈ ఉచిత ఈవెంట్‌లో  పాల్గొన్నవారు డ్యాన్సులు, వివిధ కార్యక్రమాలతో ఎంతో ఉల్లాసంగా గడిపారని  వాలంటీర్‌ కృష్ణపవన్‌ చల్లా ఓ ప్రకటనలో తెలిపారు.