US: అరుదైన గౌరవం.. అమెరికాలో వీధికి ‘గణేశ్ టెంపుల్ స్ట్రీట్’గా నామకరణం

న్యూయార్క్‌: అగ్రరాజ్యంలో భారతీయ సంస్కృతికి అరుదైన గౌరవం దక్కింది. అక్కడి ఓ వీధికి ‘గణేశ్‌ టెంపుల్ స్ట్రీట్’ అని నామకరణం చేశారు. న్యూయార్క్‌ క్వీన్స్ కౌంటీలోని ఫ్లషింగ్‌లో 1977లో ది హిందూ టెంపుల్ సొసైటీ ఆఫ్ నార్త్ అమెరికా ఆధ్వర్యంలో మహా వల్లభ గణపతి దేవస్థానాన్ని స్థాపించారు. అప్పటినుంచి ఆ దేవాలయాన్ని గణేశ్‌ టెంపుల్ అని పిలుస్తున్నారు. ఇది ఉత్తర అమెరికాలోని పురాతన హిందూ దేవాలయంగా ప్రసిద్ధి చెందింది. అక్కడున్న  ఎన్నారైలు ఆలయానికి వెళ్లి పూజలు, అర్చనలు చేస్తున్నారు.

కాగా ఆ గుడి బయట ఉన్న వీధికి ‘బౌనీ స్ట్రీట్’ అని పేరు. బానిసత్వానికి వ్యతిరేకంగా ఉద్యమించిన ప్రముఖ అమెరికన్ మార్గదర్శకుడు జాన్ బౌనీ పేరు ఆ వీధికి పెట్టారు. అయితే ప్రస్తుతం ఈ వీధికి గణపతి ఆలయం అనే పేరును కూడా జత చేశారు. శనివారం జరిగిన ఓ ప్రత్యేక కార్యక్రమంలో  ఆలయ గౌరవార్థం ఆ వీధికి బౌనీ పేరుతో పాటు గణేశ్‌ టెంపుల్ స్ట్రీట్‌గా  అధికారికంగా ప్రకటించారు. దీంతో అక్కడున్న భారతీయులంతా ఆనందం వ్యక్తం చేశారు.

పేరును జోడించి దానికి సంబంధించిన ఓ చిహ్నాన్ని న్యూయార్క్‌లోని భారత కాన్సుల్ జనరల్ రణధీర్ జైస్వాల్, క్వీన్స్ బోరో ప్రెసిడెంట్ డోనోవన్ రిచర్డ్స్, న్యూయార్క్ నగర మేయర్ ఎరిక్ ఆడమ్స్ ఆవిష్కరించారు. ఈ సందర్భంగా రణధీర్ జైస్వాల్ మాట్లాడుతూ.. వీధి పేరు జోడించడం వెనుక ఎన్నో ఏళ్ల కృషి ఉందని, దీంతో ఇండో అమెరికన్ కమ్యూనిటీ గొప్పదనం గురించి ఇంకా బాగా తెలుస్తుందని పేర్కొన్నారు. గతేడాది డిసెంబర్‌లో న్యూయార్క్ సిటీ కౌన్సిల్ ఆధ్వర్యంలోని ఓ కమిటీ బౌన్ స్ట్రీట్‌, గణేశ్‌ టెంపుల్ స్ట్రీట్‌ అనే పేరు జోడించడానికి ఆమోదించిందని ఆలయ సోషల్ మీడియా పోస్ట్‌లో పేర్కొంది. ఈ సందర్భంగా భక్తులందరికీ ధన్యవాదాలు తెలిపింది.