సౌదీ అరేబియాలో ఘనంగా తెదేపా ఆవిర్భావ వేడుకలు

ఇంటర్నెట్‌డెస్క్‌: సౌదీ అరేబియాలో తెదేపా 40వ ఆవిర్భావ దినోత్సవాన్ని ఘనంగా నిర్వహించారు. సౌదీలోని కొబార్‌, జూబిలీ ప్రాంతాల్లో ఎన్‌ఆర్‌ఐలు తొలిసారిగా ఆవిర్భావ దినోత్సవాన్ని జరుపుకొన్నారు. ఈ సందర్భంగా కేక్‌ కట్‌ చేసి పరస్పరం శుభాకాంక్షలు తెలుపుకొన్నారు. ఆవిర్భావ దినోత్సవం సందర్భంగా జూమ్‌ సమావేశం నిర్వహించారు. 

ఈ సమావేశంలో ప్రవాసి తెదేపా కోఆర్డినేటర్‌ బుచ్చి రాంప్రసాద్ మాట్లాడుతూ మొదటిసారి సౌదీ అరేబియాలో తెదేపా ఆవిర్భావ దినోత్సవాన్ని నిర్వహించడం అభినందనీయమని చెప్పారు. ఎన్టీఆర్‌ స్థాపించిన తెదేపా అధికారంలోకి వచ్చాక ప్రజలకోసం ప్రవేశపెట్టిన ఎన్నో సంక్షేమ పథకాలు ప్రజలు మేలు చేశాయన్నారు. తెదేపా నేత రావి రాధాకృష్ణ మాట్లాడుతూ ఏపీ ముందుకెళ్లాలంటే చంద్రబాబు విజన్‌ ఎంతో అవసరమని.. వచ్చే ఎన్నికల్లో ఎన్‌ఆర్‌ఐలు తెదేపాకు అండగా ఉండి గెలిపించాల్సిన అవసరముందన్నారు. ఇప్పుడున్న పరిస్థితులను చంద్రబాబు మాత్రమే చక్కదిద్దగలరని చెప్పారు. ఈ సమావేశంలో ఎన్‌ఆర్‌ఐ తెదేపా నేతలు భర్ద్వాన్‌ మాదాల, మద్దకూరి చంద్రశేఖర్‌, నాగేశ్వరరావు బలుసు, అడబాల చిన్నా, నర్సింహ చిలుకు తదితరులు పాల్గొన్నారు.