కాన్సాస్‌లో ఉత్సాహంగా ‘నాట్స్ తెలుగమ్మాయి’ పోటీలు

కాన్సాస్: అమెరికాలో కాన్సాస్‌లో ‘ఉత్తర అమెరికా తెలుగు సంఘం’ (నాట్స్) ఆధ్వర్యంలో "నాట్స్ తెలుగమ్మాయి" పోటీలు ఉత్సాహంగా జరిగాయి. వీటిల్లో పాల్గొన్న బాలికలు, మహిళలు ఆట,పాటలతో సందడి చేశారు. శాస్త్రీయ, జానపద నృత్యాలతో పాటు ఏకపాత్రాభినయం,టాలీవుడ్ పాటలకు డ్యాన్స్‌లతో అదరగొట్టారు.  అలాగే అలనాటి మేటి తెలుగు సినీతారలు జమున, సూపర్ స్టార్ కృష్ణలను గుర్తు చేసుకుంటూ వారికి నివాళిగా ప్రదర్శించిన పలు నృత్యాలు అలరించాయి. 'విశ్వమోహన్ అమ్ముల' మహిళలకు సంబంధించిన పాత పాటలు ఆలపించి అందరినీ మంత్రముగ్దుల్ని చేశారు. 

అమెరికాలో పుట్టి పెరిగిన పిల్లలకు, మహిళలకు తెలుగు సంస్కృతీ సంప్రదాయాలను తెలియజేయడమే లక్ష్యంగా ‘నాట్స్‌ తెలుగమ్మాయి’ కార్యక్రమాన్ని జాతీయ స్థాయిలో నిర్వహిస్తోంది. తెలుగు భాష, మన కట్టు,బొట్టు,తెలుగుతనం రేపటి తరానికి పరిచయం చేసేందుకు ఈ పోటీలు దోహదపడుతున్నాయి. ఈ  పోటీల్లో భాగంగా "ముద్దుగుమ్మ(18 ఏళ్ల లోపు)", "కిన్నెరసాని (19+ సంవత్సరాలు)"  "కావ్యనాయకి (19+ ఏళ్లు పైబడిన వివాహిత)" మహిళలకు వివిధ విభాగాల్లో పోటీలు నిర్వహించారు. ఈ పోటీల్లో ప్రతిభ, సంస్కృతిపై అవగాహన,రూపకాలు,ఆటపాటలు, భగవద్గీత పఠనం వంటి అంశాలు ఉన్నాయి. ఈ పోటీల్లో విజేతలకు జాతీయ స్థాయి పోటీల్లో పాల్గొనే అర్హత కల్పించారు. న్యాయ నిర్ణేతలుగా చైతన్య రంగిని,రేణుక గుమ్మడిపూడి,రమాదేవి కీలక పాత్ర పోషించారు.

 ఈ కార్యక్రమాన్ని ‘నాట్స్’ జాతీయ సమన్వయకర్త వెంకట్‌ మంత్రి, రవి గుమ్మడిపూడి, నాట్స్ కాన్సాస్‌ చాప్టర్ సమన్వయకర్త ప్రసాద్ ఇసుకపల్లి ఆధ్వర్యంలో దిగ్విజయంగా నిర్వహించారు. "నాట్స్ తెలుగమ్మాయి" పోటీల నిర్వహణకు ఈవెంట్ కో ఆర్డినేటర్‌గా  పార్వతి చిల్లర వ్యవహరించారు. రవి ఆయాసల, వెన్నెల నీతిపూడిలు ఈ కార్యక్రమానికి వ్యాఖ్యాతలుగా వ్యవహరించారు. "నాట్స్ తెలుగమ్మాయి" పోటీలను విజయవంతం చేసేందుకు రాధికా మంత్రి, రమాదేవి పొట్టం, సాయిరాం గండ్రోతుల, వేణు రవికాంత్ గార, మదన్ సానీ, విజయ్ రంగిని, సూర్య కాగడం, వెంకట్ వల్లూరిపల్లి, సౌజన్య రావు, శ్రీనివాస్ అబ్బూరి, రిత్విక్ అమ్మిరెడ్డి, చైతలిక మంత్రి, చరణి రంగిని, రామ్ సంగేమ్, జావిద్ మహ్మద్ తదితరులు కృషిచేశారు. తెలుగమ్మాయి విజేతల్లో ‘చిట్టి చిలకమ్మ’ విభాగంలో అక్షర రేపల్లె, మీనాక్షి అయ్యల సోమయాజులు, రిత్వి మహంకాళి, లౌక్య జమిలి ఉన్నారు. నాట్స్ కాన్సాస్‌ ముద్దుగుమ్మ విభాగంలో క్రిష కరే, సాయి సాత్విక చాడ, సాయి స్వప్నిక చాడ, అక్షర బొగ్గవరపు విజేతలుగా నిలిచారు. మిసెస్ నాట్స్ కాన్సస్ కిన్నెరసాని విభాగంలో విజేతలుగా శ్రీనిథి రావు, మిసెస్ నాట్స్ కాన్సస్ కావ్యనాయకి విభాగంలో సోనాలిక పడాల, నీలిమ పుండ్ల, సౌమ్య గిరి నిలిచారు. ఈ కార్యక్రమానికి విరాళాలతో పాటు సహకరించిన ప్రతి ఒక్కరికీ నాట్స్ ఛైర్‌విమెన్‌ అరుణ గంటి, నాట్స్ అధ్యక్షులు బాపయ్య చౌదరి (బాపు) నూతి ప్రత్యేక కృతజ్ఞతలు తెలిపారు.