US: బైడెన్​ అడ్వైజరీ కమిషన్​లో నలుగురు భారతీయ అమెరికన్లు

వాషింగ్టన్‌: భారతీయ అమెరికన్లకు మొదటినుంచి ప్రాధాన్యం ఇస్తూ వచ్చిన అమెరికా అధ్యక్షుడు జో బైడెన్.. మరోసారి తన ప్రభుత్వంలో వారికి చోటు కల్పించారు. ఆసియా అమెరికన్లు, నేటివ్​ హవాయన్స్​ సహా పసిఫిక్​ దీవులకు (ఏఏఎన్​హెచ్​పీఐ) చెందిన వారి కోసం తాజాగా ఏర్పాటు చేసిన అడ్వైజరీ కమిషన్​లో నలుగురు ఇండో అమెరికన్లను నియమించారు. ఈ విషయాన్ని శ్వేతసౌధం వెల్లడించింది. భారతీయ అమెరికన్లయిన అజయ్​ భుటోరియా, సోనాల్​ షా, కమల్​ కాల్సి, స్మితా షాలకు 23 మంది సభ్యులుగల అడ్వైజరీ కమిషన్​లో చోటు కల్పిస్తున్నట్లు శ్వేతసౌధం ప్రకటనలో పేర్కొంది.

అజయ్​ భుటోరియా సిలికాన్​ వ్యాలీలో టెక్నాలజీ ఎగ్జిక్యూటివ్​గా పనిచేస్తూ.. ఆసియన్​ అమెరికన్లు​, పసిఫిక్​ ఐలాండర్స్​ కోసం కృషి చేశారు. డెమోక్రటిక్​ పార్టీకి చెందిన ఆర్థిక వేత్త సోనాల్​ షా అక్కడ విద్యారంగంలో విశేష కృషి చేశారు. డాక్టర్​ కమల్​ సింగ్​ కాల్సి అమెరికా సైన్యానికి 20 ఏళ్ల పాటు సేవలు అందించారు. అఫ్గానిస్థాన్​లో ఆయన అందించిన సేవలకుగాను ప్రభుత్వం ఆయనకు బ్రాన్జ్​ స్టార్​ మెడల్​ను​ ఇచ్చి గౌరవించింది. ఇంజినీర్​, వ్యాపారవేత్త అయిన స్మితా ఎన్​ షా.. షికాగోకు చెందిన స్పాన్​ టెక్​కు సీఈఓగా పనిచేస్తున్నారు.

ప్రతి ఆసియా అమెరికన్, స్థానిక హవాయిలు, పసిఫిక్ ద్వీపవాసుల కమ్యూనిటీకి సమాన అవకాశాలను కల్పించేలా లాభాపేక్షలేని పబ్లిక్, ప్రైవేటు రంగాలు కలిసి పని చేసే మార్గాలపై ఈ కమిషన్ అధ్యక్షుడికి సలహాలు అందివ్వనుంది. వారి సంక్షేమం కోసం చేపట్టాల్సిన చర్యలపై సూచనలు చేస్తుంది. అంతేకాకుండా.. ఆసియన్లు ఎదుర్కొంటున్న విద్వేషం, హింసను కట్టడి చేయడంపై కూడా అధ్యక్షుడికి సూచనలు అందిస్తుంది.