Visa: హెచ్‌-1బీ వీసాదారులకు గుడ్‌న్యూస్‌.. హెచ్‌-4 వీసాలపై బిల్లు

వాషింగ్టన్‌: అమెరికాలో హెచ్‌-4 వీసాదారులకు ఆటోమేటిక్‌ వర్క్‌ రైట్‌ను కల్పించే బిల్లును ఇద్దరు చట్టసభ్యులు ప్రతినిధుల సభలో ప్రవేశపెట్టారు. ఈ బిల్లు ఆమోదం పొందితే భారతీయులతో పాటు వేలాది మంది వలసదారులు, వారి భాగస్వాములకు ప్రయోజనం చేకూరడటమే గాక, అగ్రరాజ్యంలో కార్మిక కొరతకూ పరిష్కారం లభించనుంది.

అమెరికాలో హెచ్‌-1బీ వీసాదారుల జీవిత భాగస్వాములు, 21 ఏళ్లలోపు వయసున్న వారి పిల్లలు ఉద్యోగం చేసుకోవడానికి వీలుగా హెచ్‌-4 వీసాలు జారీ చేస్తుంటారు. అయితే హెచ్‌-4 వీసాదారులు అమెరికాలో ఉద్యోగం చేయాలంటే వారు తప్పనిసరిగా ఎంప్లాయిమెంట్‌ ఆథరైజేషన్‌ డాక్యుమెంట్‌(ఈఏడీ), ఐ-765 కోసం దరఖాస్తు చేసుకోవాల్సి ఉంటుంది. ఈ దరఖాస్తు ప్రక్రియ పూర్తయి ఆథరైజేషన్‌ వస్తేనే వారు ఉద్యోగం చేసేందుకు అవకాశం లభిస్తుంది. అయితే ఈ ప్రక్రియ పూర్తవడానికి 6 నుంచి 8 నెలల సమయం పడుతుంది. కొన్ని సార్లయితే ఏడాదిపైనే పట్టొచ్చు.

దీనివల్ల హెచ్‌-4 వీసాదారులు మంచి ఉద్యోగ అవకాశాలు కోల్పోవాల్సి వస్తోంది. మరోవైపు, అమెరికాలోనూ గత కొంతకాలంగా ఉద్యోగుల కొరత ఏర్పడుతోంది. ఈ నేపథ్యంలోనే ప్రస్తుతమున్న నిబంధనలు మార్చి హెచ్‌-4 వీసాదారులకు ఆటోమేటిక్‌గా వర్క్‌ ఆథరైజేషన్‌ కల్పించేలా ఓ బిల్లును రూపొందించి ప్రతినిధుల సభలో ప్రవేశపెట్టారు. ఈ బిల్లు ఆమోదం పొందితే, ఇకపై హెచ్‌-4 వీసాదారులు పని అనుమతుల కోసం ఎలాంటి దరఖాస్తులు చేసుకోవాల్సిన అవసరం ఉండదు. దీంతో వలసదారులకు ప్రయోజనం చేకూరడటంతో పాటు అమెరికాలోనూ కార్మిక కొరత తీరే అవకాశముందని చట్టసభ్యులు భావిస్తున్నారు.

ఒబామా హయాంలో హెచ్‌-1బీ వీసాదారుల భాగస్వాములకు పని అనుమతులు కల్పిస్తూ కీలక నిర్ణయం తీసుకున్న విషయం తెలిసిందే. దీంతో అమెరికా వెళ్లే వలసదారులకు ఆర్థికంగా కొంత ఊరట లభించింది. ఈ వీసాలు పొందిన వారిలో ఎక్కువగా భారతీయ మహిళలే ఉన్నారు.