విషమంగానే తరుణ్‌ గొగొయి ఆరోగ్యం

వెల్లడించిన  గువాహటి వైద్యకళాశాల

గువాహటి: కాంగ్రెస్‌ సీనియర్‌ నేత, అసోం మాజీ సీఎం తరుణ్‌ గొగొయి ఆరోగ్య పరిస్థితి విషమంగానే ఉంది. ఈమేరకు గువాహటి వైద్య కళాశాల సూపరింటెండెంట్‌ అభిజీత్‌ శర్మ వెల్లడించారు. శరీరంలోని పలు అవయవాల పనితీరు క్షీణించడంతో శనివారం సాయంత్రం ఆయన్ను గువాహటి వైద్యకళాశాలలో చేర్పించారు. అప్పటికే ఆయన పరిస్థితి విషమంగా ఉండటంతో వెంటిలేటర్‌పై చికిత్స అందించారు. అయితే నిన్నటితో పోల్చుకుంటే ఇవాళ గొగొయి ఆరోగ్యం కాస్త మెరుగుపడిందని సూపరింటెండెంట్‌ తెలిపారు. 85 ఏళ్ల గొగొయికి గత అక్టోబర్‌లో ఆయాసం రావడంతో గువాహటి వైద్య కళాశాలకు తరలించి ఐసీయూలో ఉంచి చికిత్స అందించారు. ఆ తర్వాత ఆయనకు కరోనా పాజిటివ్‌గా నిర్ధారణ అయింది. ప్లాస్మా థెరఫీ ద్వారా కోలుకున్న ఆయన అక్టోబర్‌ 25న ఆస్పత్రి నుంచి డిశ్చార్జి అయ్యారు.